Шэсць новых дэкрэтаў у справах па кананізацыі і беатыфікацыі
Аляксандр Амяльчэня - Vatican News
Падчас аўдыенцыі 25 лістапада 2024 года, якую Францішак даў кардыналу Марчэла Сэмерара, прэфекту Дыкастэрыі па справах кананізацыі, былі зацверджаны некалькі важных дэкрэтаў.
Найперш – дэкрэт аб цудзе праз заступніцтва благаслаўлёнага П'ера Джорджа Фрасаці, свецкага верніка Трэцяга ордэна святога Дамініка. Ён нарадзіўся 6 красавіка 1901 года ў Турыне і памёр там жа 4 ліпеня 1925 года ва ўзросце 24 гадоў. Быў вядомы сваёй дабрачыннай дзейнасцю і глыбокай духоўнасцю, спалучаючы актыўнае сацыяльнае служэнне з інтэнсіўным малітоўным жыццём.
Таксама быў зацверджаны дэкрэт аб цудзе праз заступніцтва благаслаўлёнай Марыі Транкаці, манахіні Кангрэгацыі Дачок Марыі Дапаможніцы, якая нарадзілася ў Італіі і памерла ў Эквадоры, дзе праводзіла місіянерскую дзейнасць сярод карэннага насельніцтва.
Былі зацверджаны дэкрэты аб пакутніцкай смерці двух Божых слугаў: в'етнамскага святара Франсуа Ксаўе Чыонг Быу Дзьепа і маладога свецкага верніка з Дэмакратычнай Рэспублікі Конга Фларыбера Бвана Чуі Бін Косіці. Абодва былі забітыя з нянавісці да веры.
Папа таксама зацвердзіў дэкрэт аб гераічнасці цнотаў харвацкага біскупа Ёсіпа Ланга і пацвердзіў старажытны культ (прыраўнаны да беатыфікацыі) манахіні Хуаны ад Крыжа (свецкае імя: Хуана Васкес і Гуцьерэс), якая жыла ў Іспаніі ў XV-XVI стагоддзях.
