Анёл Панскі: Святая Сям'я вучыць нас слухаць адзін аднаго
Марыя Валодзіна - Vatican News
Ва ўрачыстасць Святой Сям'і з Назарэта Пантыфік звярнуўся да вернікаў з разважаннем пра ролю дыялогу і слухання ў сям’і. Ён нагадаў евангельскі аповед аб тым, як дванаццацігадовы Езус згубіўся падчас штогадовага паломніцтва ў Ерузалем. Марыя і Юзаф знайшлі Яго ў Святыні, дзе Ён размаўляў з настаўнікамі (пар. Лк 2, 41-52). Евангеліст Лука раскрывае душэўны стан Марыі, якая пытаецца ў Езуса: "Дзіця, чаму Ты зрaбiў нaм тaк? Вoсь бацька Твoй i я балюча перажывалі, шукaючы Цябе". І Езус адказвае Ёй: "Чaгo ж вы шукaлі Мяне? Цi вы не ведaлі, штo Мне трэбa быць у тым, што належыць Aйцу Мaйму?"
На думку Францішка, гэты выпадак нагадвае крызіс у сучаснай сям'і: “цяжкага падлетка і двух бацькоў, якія не могуць яго зразумець”. Ён прапанаваў слухачам спыніцца і паразважаць пра Святую Сям'ю, якая з'яўляецца ўзорам, таму што “вядзе дыялог”. “Дыялог – гэта самы важны элемент для сям'і! Сям'я, якая не падтрымлівае камунікацыю, не можа быць шчаслівай сям'ёй”, - сказаў Папа.
“Выдатна, калі маці пачынае не з папроку, а з пытання. Марыя не абвінавачвае і не асуджае, а імкнецца зразумець, як прыняць сваё Дзіця з Яго адрозненнямі, слухаючы Яго. Евангелле кажа, што, нягледзячы на намаганні, Марыя і Юзаф "не зрaзумелі таго, што Ён скaзaў iм". Гэта сведчыць аб тым, што ў сям'і важней слухаць, чым разумець. Слухаць – значыць надаваць сэнс іншаму чалавеку, прызнаваць яго права на існаванне і самастойнае мысленне. Дзеці маюць у гэтым патрэбу”, - падкрэсліў Святы Айцец.
“Прывілеяваным момантам дыялогу і слухання ў сям'і з'яўляецца час ежы. Добра сядзець усім разам за сталом і размаўляць. Гэта можа вырашыць шмат праблем і, перш за ўсё, аб'яднаць пакаленні: дзеці размаўляюць з бацькамі, унукі размаўляюць з бабулямі і дзядулямі... Ніколі не замыкацца ў сабе або, што яшчэ горш, заставацца сам-насам у тэлефоне. Размаўляць, слухаць адзін аднаго – вось дыялог, які прыносіць дабро і дапамагае расці!” - сказаў Папа.
“Сям'я Езуса, Марыі і Юзафа – святая. І ўсё ж мы бачым, што нават бацькі Езуса не заўсёды разумелі Яго. Мы можам паразважаць над гэтым, і не варта здзіўляцца, калі часам у нашых сем'ях здараецца, што мы не разумеем адзін аднаго. Калі гэта здараецца з намі, давайце спытаем сябе: ці слухалі мы адзін аднаго? Ці вырашаем мы праблемы, слухаючы адзін аднаго, ці не замыкаемся ў маўчанні, часам у крыўдзе, пысе? Ці знаходзім мы час для дыялогу? Сёння мы можам навучыцца ў Святой Сям'і ўзаемнаму слуханню. Даверымся Панне Марыі і папросім для нашых сем'яў дар слухання”, - заклікаў Францішак.
