2024 год Францішка: новыя святыя, падарожжы і энцыкліка
Аляксандр Амяльчэня - Vatican News
2024 год стаў для Францішка перыядам інтэнсіўнай душпастырскай дзейнасці і значных падзей у жыцці Касцёла. Пантыфік працягваў сваю місію, нягледзячы на выклікі часу і ўзрост, паказваючы прыклад нястомнага служэння.
Касцёл павінен быць побач з кожным чалавекам
Гэты прынцып Францішак рэалізаваў праз тры буйныя замежныя пілігрымкі. У верасні ён наведаў чатыры краіны Азіі і Акіяніі – Інданезію, Папуа-Новую Гвінею, Усходні Тымор і Сінгапур, дзе сустракаўся з мясцовымі хрысціянскімі супольнасцямі і вёў міжрэлігійны дыялог. У канцы верасня Папа наведаў Люксембург і Бельгію, а ў снежні – Корсіку, умацоўваючы еўрапейскую еднасць.
Святасць – гэта адказ на Божую любоў
У 2024 годзе адбыліся тры кананізацыі, падчас якіх да ліку святых былі далучаны 33 асобы. Сярод іх – група мучанікаў з Дамаска, заснавальнікі манаскіх супольнасцей і 16 кармелітак з Камп’ена. Акрамя таго, было праведзена 12 беатыфікацый, якія далі Касцёлу 16 новых благаслаўлёных.
Кардыналы – гэта слугі еднасці Касцёла
Знамянальнай падзеяй стаў снежаньскі кансісторый, дзе 21 прадстаўнік духавенства атрымаў кардынальскую годнасць. Калегія кардыналаў дасягнула рэкорднай лічбы – 253 іерархі, з якіх 139 маюць права ўдзельнічаць у магчымым канклаве.
У кастрычніку Францішак апублікаваў сваю чацвёртую энцыкліку Dilexit nos, прысвечаную тэме Божай і чалавечай любові. Дакумент стаў важным унёскам у развіццё касцельнага вучэння аб любові і міласэрнасці.
Місія Касцёла – несці любоў Хрыста кожнаму
2024 год адзначыўся таксама актыўнай дыпламатычнай дзейнасцю Пантыфіка. Ён прыняў 84 палітычных дзеячаў з 45 краін і прадстаўнікоў 15 міжнародных арганізацый, спрыяючы міру і справядлівасці ў свеце.
Важным аспектам дзейнасці Францішка стала прызначэнне новых біскупаў – 232 асобы. 5 красавіка ён прызначыў ксяндза Уладзіміра Гуляя біскупам-каад’ютарам Гродзенскай дыяцэзіі, а 30 верасня – яе пастырам.
На працягу года Францішак працягваў здзяйсняць традыцыйныя абрады, уключаючы хрост 24 асоб, уручэнне 40 арцыбіскупам-мітрапалітам паліеў і ўдзяленне святарскага пасвячэння 16 семінарыстам.
