Францішак прыняў на аўдыенцыі прэзідэнта Славакіі
Аляксандр Панчанка – Vatican News
Сустрэча Папы Францішка з прэзідэнтам Славацкай Рэспублікі доўжылася 25 хвілін. Пасля яе Пелегрыні правёў перамовы з кардыналам-дзяржсакратаром П’етра Паралінам, якога суправаджаў арцыбіскуп Пол Рычард Галахер, сакратар па адносінах з дзяржавамі і міжнароднымі арганізацыямі.
“Падчас сардэчнай сустрэчы ў Дзяржаўным сакратарыяце былі згаданыя моцныя двухбаковыя адносіны, падкрэслены ўклад Касцёла ў славацкае грамадства. Бакі абмеркавалі міжнародны кантэкст, надаўшы асаблівую ўвагу канфліктам ва Украіне і на Блізкім Усходзе”, - паведаміла Зала Друку Апостальскай Сталіцы.
Падчас сустрэчы славацкага лідара з Папам адбыўся традыцыйны абмен падарункамі. Святы Айцец падарыў прэзідэнту бронзавую скульптуру пад назвай Сацыяльная любоў, а таксама некалькі выданняў сваіх дакументаў, у тым ліку сёлетняе пасланне на Сусветны дзень міру. Пітэр Пелегрыні, у сваю чаргу, уручыў Францішку трохмерную карціну, зробленую славацкім мастаком Юраем Кралікам.
