Папа адчыніў Святую Браму Базілікі святога Пятра
Марыя Валодзіна - Vatican News
Абрад адкрыцця Святой Брамы глыбока сімвалічны. Папа папрасіў адчыніць для яго дзверы і праехаў праз іх у калясцы як першы пілігрым пад перазвон званоў, якія абвясцілі ўсяму свету пачатак Юбілейнага года.
Святы год – асаблівы час у жыцці Касцёла. Кожны вернік, які здзейсніць пілігрымку ў Рым і пройдзе праз Святую Браму, пры выкананні пэўных умоў можа атрымаць поўны адпуст і духоўна абнавіцца.
Акрамя ватыканскай базілікі, Святыя Брамы адчыняць у трох папскіх базіліках Рыма, а менавіта святога Яна на Латэране, Санта-Марыя-Маджорэ і святога Паўла за Мурамі. Акрамя таго, Папа выказаў жаданне асабіста адчыніць Святую Браму ў рымскай турме Рэбібія.
Святы год будзе праходзіць у Каталіцкім Касцёле з 24 снежня 2024 года па 6 студзеня 2026 года пад дэвізам Пілігрымы надзеі.
