Францішак: музыканты павінны быць анёламі міру
Аляксандр Амяльчэня - Vatican News
Папа Францішак падкрэсліў дзве галоўныя каштоўнасці, якія могуць несці творцы: мір і надзею. Ён нагадаў, што пры нараджэнні Езуса анёльскі спеў напоўніў радасцю неба і зямлю. "Музыка, размаўляючы асаблівым і непасрэдным чынам з сэрцам чалавека, мае велізарную здольнасць ствараць адзінства і спрыяць яму”, - падкрэсліў Пантыфік.
Святы Айцец высока ацаніў выбар прысвяціць сёлетні канцэрт тэме надзеі, якая з'яўляецца правадной ніткай мастацкіх і салідарных сведчанняў артыстаў, асабліва ў падтрымку місіянераў, якія працуюць з моладдзю па ўсім свеце. "Надзея – гэта перш за ўсё дар Божы, які грунтуецца на веры і жывіцца любоўю", - падкрэсліў Папа.
Францішак заахвоціў артыстаў напаўняць вуліцы свету спевам міру і надзеі, каб перадаць будучым пакаленням свет, які стаў лепшым і багацейшым на дабро. Асаблівую ўвагу Святы Айцец звярнуў на маладых удзельнікаў Christmas Contest, падкрэсліўшы важнасць здаровага саюзу паміж пакаленнямі.
"Свет і Касцёл маюць вялікую патрэбу ў вашым таленце, вашай творчай ідэйнасці, вашай здольнасці дарыць сябе, вашай прыхільнасці да справядлівасці і братэрства", - заключыў Папа.
