Анёл Панскі: быць светлымі сведкамі Божай любові
Марыя Валодзіна - Vatican News
Папа спаслаўся на евангельскі ўрывак (Ян 1, 1-18), у якім гаворыцца пра Слова, якое стала целам, уцелавілася. "Святло свеціць у цемры, і цемра не агарнула яго" (Ян 1, 5). “Гэта нагадвае нам, наколькі магутная любоў Божая, якая не спыняецца перад перашкодамі і адмовамі, працягвае ззяць і асвятляць наш шлях”, - сказаў Францішак.
“На Божае Нараджэнне Сын Божы, які стаў чалавекам, пераадольвае шмат муроў і падзелаў. Ён сутыкаецца з закрытасцю магутных людзей свайго часу, якія больш клапаціліся пра захаванне сваёй улады, чым пра пошук Бога. (Мц 2, 3-18). Езус жыве сціплым жыццём з Марыяй і Юзафам, якія прымаюць і выхоўваюць Яго з любоўю, нягледзячы на абмежаваныя магчымасці і складанасці тых, хто не мае сродкаў, хто бедны. Крохкі і безабаронны, Ён адкрываецца для сустрэчы з пастухамі (пар. Лк 2, 8-18), простымі людзьмі, чые сэрцы пазначаны цяжкасцямі жыцця і пагардай грамадства, а таксама з мудрацамі (пар. Мц 2, 1), якія, жадаючы сустрэць Яго, здзяйсняюць доўгае падарожжа і знаходзяць Яго ў доме простых людзей, у вялікай беднасці”, - нагадаў Пантыфік.
Святы Айцец нагадаў аб тым, што Бог дзейнічае нават у самыя цяжкія перыяды гісторыі, “адчыняючы вокны святла нават у самыя цёмныя ночы чалавецтва”. Евангелле заклікае нас наследаваць Божую любоў, не баяцца зрабіць першы крок, адчыніць светлыя вокны блізкасці для тых, хто пакутуе, мае патрэбу ў прабачэнні, спачуванні і прымірэнні. Гэты заклік асабліва моцна гучыць у Юбілейны год, запрашаючы нас быць пасланцамі надзеі, здзяйсняючы простыя і канкрэтныя ўчынкі, якія прыносяць жыццё і пазітыўныя змены.
Папа заахвоціў вернікаў на пачатку новага года паразважаць над тым, як адчыніць акно святла ў сваім асяроддзі і ў адносінах, стаць праменем, які дазваляе Божай любові пранікаць у жыццё іншых.
“Марыя – зорка, якая вядзе да Езуса, – няхай дапаможа нам быць для ўсіх светлымі сведкамі любові Айца”, - заклікаў Францішак.
