Анёл Панскі: няхай цішыня Божага Нараджэння прынясе мір
Аляксандр Амяльчэня - Vatican News
Папа засяродзіў увагу вернікаў на евангельскім аповедзе пра пастухоў, якія прыйшлі пакланіцца нованароджанаму Збаўцу. Святы Айцец падкрэсліў, што сустрэча з Дзіцяткам Езусам напоўніла іх здзіўленнем і радасцю, бо яны ўбачылі абяцанага Месію.
"Усе людзі з'яўляюцца дзецьмі, але ніхто з нас не выбіраў нарадзіцца. Бог жа выбраў нарадзіцца дзеля нас. Езус – гэта аб'яўленне Яго вечнай любові, якая прыносіць у свет мір", - заўважыў ён. Святы Айцец таксама звярнуў увагу на постаць Марыі, якая захоўвала ў сваім сэрцы ўсе падзеі, звязаныя з нараджэннем Збаўцы.
"Маці заўсёды думаюць пра сваіх дзяцей. Сёння, у гэты першы дзень года, прысвечаны міру, думаем пра ўсіх маці, якія радуюцца ў сваіх сэрцах, і пра ўсіх маці, чые сэрцы поўныя болю, бо іх дзяцей забрала гвалтоўнасць, пыха, нянавісць. Які прыгожы мір! І як нечалавечна выглядае вайна, якая разбівае сэрцы маці!", - сказаў Папа.
Напрыканцы Святы Айцец заклікаў кожнага задумацца над тым, ці ўмее ён у цішыні сузіраць нараджэнне Езуса і захоўваць у сэрцы гэтую падзею і яе пасланне дабрыні і збаўлення. "Як я магу адказаць на такі вялікі дар бескарыслівым жэстам міру, прабачэння, паяднання? Кожны з нас знойдзе нешта, што можа зрабіць. І гэта прынясе дабро", - падкрэсліў Папа Францішак.
