Арцыбіскуп Палья ўхваліў рашэнне ЗША адносна патэнтаў на вакцыны

Ян Глінскі - Vatican News

Старшыня Папскай акадэміі жыцця лічыць гэта праяўленнем “планетарнага позірку, а не індывідуальнага”. Да адмены патэнтаў заклікаў таксама Папа Францішак.

У размове з аргентынскім агенцтвам Telam арцыбіскуп Палья патлумачыў, што неабходнасць адмаўлення ад патэнтаў вынікае не толькі з пункту гледжання справядлівасці, але і з агульнага “інтарэсу”, бо “вірус не ведае ні законаў, ні межаў”.

Іерарх нагадаў, што Францішак неаднойчы заклікаў да масавай вытворчасці вакцыны і яе размеркаванні сярод усіх без выключэння.

“Я за тое, каб на акрэслены час, пакуль усе не атрымаюць вакцыну, прыпыніць права ўласнасці да патэнтаў”, - сцвердзіў старшыня Папскай акадэміі жыцця. На яго думку, “супольнае дабро ў гэтым выпадку з’яўляецца дастатковай прычынай, каб прыпыніць слушныя правы навукоўцаў”, якія стварылі вакцыны.

ЗША, як і Еўрасаюз, да гэтага часу не давалі згоду на такое выйсце, нягледзячы на недахоп вакцын і павелічэнне колькасці інфіцыяваных у свеце.

“Сусветны санітарны крызіс і надзвычайныя акалічнасці пандэміі COVID-19 патрабуюць надзвычайных ахоўных сродкаў”, - патлумачыла прадстаўніца ЗША ў Сусветнай гандлёвай арганізацыі (WTO) Катрын Тай, дадаўшы пры гэтым, што З’яднаныя Штаты возьмуць удзел у перамовах у межах WTO, каб паспрыяць прыпыненню дзеяння патэнта на вакцыны.