У свеце ўсё больш гатовай да ўжывання ядзернай зброі
Аляксандр Амяльчэня - Vatican News
Дзевяць ядзерных дзяржаў працягнулі распрацоўку ядзернай зброі і мадэрнізацыю сваіх арсеналаў: ЗША, Расія, Кітай, Вялікабрытанія, Францыя, Індыя, Пакістан, Паўночная Карэя і Ізраіль.
На сённяшні дзень больш за 9 500 боегаловак знаходзяцца ў баявым стане, што амаль на 100 больш, чым у 2022 годзе. ЗША і Расія, якія па-ранейшаму валодаюць каля 90 працэнтаў усёй ядзернай зброі, трымаюць у стане павышанай гатоўнасці каля 2 000 боегаловак.
Даследаванні навукоўцаў паказваюць, што ў Кітаі адбылося значнае павелічэнне колькасці ядзернай зброі, з 350 да 410 адзінак. Да 2030 года ў краіны будзе як мінімум столькі ж міжкантынентальных ракет, колькі ў Расіі і ЗША.
"Мы перажываем адзін з самых небяспечных этапаў у гісторыі чалавецтва", - сказаў дырэктар Sipri Дэн Сміт, дадаўшы: "У часы высокай геапалітычнай напружанасці і недаверу, з закрытымі або дрэнна функцыянуючымі каналамі сувязі паміж сапернікамі, якія валодаюць ядзернай зброяй, рызыка праліку, непаразумення або выпадковасці недапушчальна высокая”.
Па гэтых прычынах, на думку Сміта, неабходна тэрмінова “аднавіць ядзерную дыпламатыю і ўзмацніць міжнародны кантроль за ядзернай зброяй”. Урады краін павінны хутка “знайсці спосабы сумеснай працы, каб зняць геапалітычную напружанасць, запаволіць гонку ўзбраенняў і ліквідаваць пагаршэнне наступстваў дэградацыі навакольнага асяроддзя і росту голаду ў свеце”, - падкрэсліў навуковец.
Францішак неаднаразова заклікаў да глабальнага раззбраення, асабліва ядзернага. “На жаль, ядзерная пагроза працягвае існаваць, выклікаючы страх ва ўсім свеце. Я магу толькі паўтарыць, што валоданне ядзернай зброяй – гэта амаральна. Калі нам пагражае ядзерная зброя, мы ўсе прайграем”, - папярэдзіў Папа ў прамове падчас навагодняй сустрэчы з дыпламатычным корпусам.
