Святы Айцец моліцца за ахвяр пажару ў Іраку
Аляксандр Панчанка – Vatican News
Папа быў глыбока засмучаны весткай пра разбуральныя наступствы пажару, у выніку якога загінулі каля 120 чалавек, яшчэ 200 атрымалі раненні. Ён запэўніў у духоўнай блізкасці ўсіх, каго закранула трагедыя, давяраючы душы загінулых любячай міласэрнасці Усемагутнага Бога і выказваючы шчырыя спачуванні тым, хто аплаквае страту сваіх блізкіх.
Францішак моліцца таксама за параненых і супрацоўнікаў ратавальных службаў, просячы аб боскіх дарах суцяшэння, аздараўлення і сілы для ўсіх, - гаворыцца ў спачувальнай тэлеграме, скіраванай за подпісам кардынала Дзяржсакратара П’етра Параліна на імя арцыбіскупа Масула Сірыйскага Бэнэдыктаса Юнана Хано.
Пажар у Каракошы адбыўся падчас святкавання вяселля ў выніку неасцярожнага выкарыстання феерверкаў. У зале, дзе праходзіла ўрачыстае мерапрыемства, не захоўваліся патрабаванні проціпажарнай бяспекі.
