Францішак запэўніў народ Кеніі ў сваёй духоўнай блізкасці
“Жадаю выказаць сваю духоўную блізкасць народу Кеніі ў гэты час, калі сур’ёзная паводка трагічна забрала жыцці многіх нашых братоў і сясцёр, параніла іншых і выклікала шырокія разбурэнні”, - сказаў Папа 1 мая 2024 года, вітаючы англамоўных пілігрымаў падчас агульнай аўдыенцыі.
Аляксандр Амяльчэня - Vatican News
“Заахвочваю вас маліцца за ўсіх, хто пакутуе ад наступстваў гэтага стыхійнага бедства. Нават у нягодах будзем памятаць пра радасць Уваскрослага Хрыста”, - звярнуўся Францішак.
Паводкі абрынуліся на Кенію з 18 красавіка 2024 года, прычыніўшы шкоду ў 21 з 47 акруг. Асабліва пацярпелі сталіца Найробі і прылеглыя да яе раёны. Рэкі Найробі і Аці выйшлі з берагоў, у выніку чаго 40 тысяч чалавек былі вымушаныя пакінуць свае дамы. Больш за 130 тысяч асоб перамешчаныя, 91 прапаў без вестак, 29 атрымалі раненні і 169 лічацца загінулымі. Паводка была часткова ўзмоцнена феноменам Эль-Ніньё.
Раніцай у панядзелак, 29 красавіка 2024 года, у Май-Махіу прарвала плаціну, у выніку чаго загінулі яшчэ 42 чалавекі.
01 мая 2024, 12:07
