Прэзідэнт Усходняга Тымора: візіт Папы – лагістычны выклік

Напярэдадні візіту Папы паўднёва-ўсходняя азіяцкая дзяржава Усходні Тымор сутыкнулася з вялізнымі выклікамі. Сярод іх – забеспячэнне вернікаў вадой і харчаваннем.

Аляксандр Амяльчэня - Vatican News

Аб велізарных лагістычных праблемах заявіў азіяцкаму каталіцкаму інфармацыйнаму агенцтву Ucanews прэзідэнт краіны Жазэ Рамуш-Орта. Аднак, па словах палітыка, яго суайчыннікі пачалі працаваць лепш пад ціскам часу.

Францішак прыбудзе ў сталіцу Дзілі 9 верасня 2024 года і застанецца на два дні. Чакаецца, што ўбачыць Папу прыедуць 700 тысяч чалавек – амаль кожны другі жыхар Усходняга Тымора. Насельніцтва краіны складае 1,34 мільёна чалавек, з якіх больш за 97 працэнтаў – католікі.

Паводле Праграмы развіцця ААН, больш за 40 працэнтаў жыхароў Усходняга Тымора жыве ніжэй за мяжу беднасці і пакутуе ад недахопу харчавання.