Урачы з Украіны вучацца ў папскім шпіталі лячыць ваенныя траўмы
Аляксандр Амяльчэня - Vatican News
Супрацоўніцтва паміж папскім і ўкраінскімі шпіталямі адбываецца ў межах праекта па ўмацаванні магчымасцей украінскіх медыцынскіх устаноў у лячэнні ахвяр выбуховых прылад. Праект фінансуецца Італьянскім агенцтвам па супрацоўніцтве ў развіцці.
"У такі складаны для Украіны час такая падрыхтоўка з'яўляецца чымсьці большым, чым проста магчымасцю атрымаць новыя тэхнічныя веды", - адзначыла Марыя Разарыя Барача, кіраўніца праграмы аховы здароўя Фонду Soleterre ва Украіне. Яна падкрэсліла, што гэта каштоўная магчымасць для ўкраінскіх урачоў не толькі абмяняцца досведам з адной з лепшых еўрапейскіх клінік, але і знайсці момант перадышкі "далёка ад сірэн і ракет".
У папскім шпіталі ўкраінскія спецыялісты атрымліваюць практычныя веды ў такіх галінах, як лячэнне дыхальных шляхоў і вентыляцыя лёгкіх, рэабілітацыя пасля чэрапна-мазгавых траўмаў і парушэнняў прытомнасці, лячэнне спастычнасці з выкарыстаннем батулінавага таксіну.
Асаблівая ўвага надаецца сучасным метадам пратэзавання і выкарыстання робататэхнікі, а таксама комплекснаму падыходу да пацыентаў са складанымі формамі інваліднасці і праблемамі глытання. Гэтыя веды асабліва важныя для лячэння дзяцей, якія пацярпелі ад выбуховых прылад.
"Вярнуцца ва Украіну з канкрэтнымі інструментамі для паляпшэння якасці педыятрычнай дапамогі і магчымасцю падзяліцца гэтымі навыкамі з калегамі – гэта не толькі крок наперад для сістэмы аховы здароўя, але і акт надзеі для многіх дзяцей, якія маюць патрэбу ў якаснай рэабілітацыі", - дадала Барача.
Супрацоўніцтва паміж шпіталямі замацавана афіцыйным дакументам, які быў падпісаны ў прысутнасці дырэктаркі Soleterre Крысціны Карнэлі, старшыні шпіталя Bambino Gesù Тыцыяна Анэсці і кіраўніцы ўкраінскага фонду Запорука Наталлі Аніпка. Гэта пагадненне накіравана на развіццё доўгатэрміновага супрацоўніцтва паміж медыцынскімі ўстановамі Святога Пасада і Украіны.
