Клініка “Джэмэлі”: дзякуем Папу за непараўнальнае сведчанне
Аляксандр Панчанка - Vatican News
“Многія хворыя ўбачылі сябе ў пакутах, якія Папа Францішак хацеў падзяліць, а не схаваць, пацвярджаючы глыбокую чалавечнасць, што адрознівае ўсё яго Настаўніцтва”, - гаворыцца ў заяве, апублікаванай з нагоды заканчэння шпіталізацыі Пантыфіка і яго вяртання ў Ватыкан.
“Калі Касцёл сапраўды пакліканы быць палявым шпіталем, як кажа Папа Францішак, клініка “Джэмэлі” і звязаны з ёй факультэт медыцыны і хірургіі не могуць не радавацца таму, што змаглі ўнесці свой уклад у аздараўленне Святога Айца”, - падкрэсліваецца ў паведамленні.
Адзначаецца, што на працягу ўсёй шпіталізацыі Францішка, якая працягвалася з 14 лютага па 23 сакавіка 2025 года, “урачы і медсёстры ўзорным чынам праявілі свой прафесіяналізм, самаадданасць і чалавечнасць – знак таго паклікання да клопату, якое горача апісаў сам Папа Францішак”.
“Мы выказваем ім самую сардэчную і шчырую падзяку за аказанне дапамогі найвышэйшай якасці, як яны гэта робяць штодня з усімі даверанымі ім пацыентамі. З такімі пачуццямі радасці і сыноўняй адданасці супольнасць клінікі і ўніверсітэта выказваюць падзяку Папу Францішку, запэўніваючы яго ў сваёй блізкасці і падтрымцы ў малітве”, - напісалі Элена Бекалі і Даніэле Франка.
