Нунцый сустрэўся з намеснікам Міністра замежных спраў Беларусі
21 кастрычніка 2020 г. Апостальскі нунцый у Рэспубліцы Беларусь арцыбіскуп Антэ Ёзіч сустрэўся з намеснікам Міністра замежных спраў Рэспублікі Беларусь Сяргеем Алейнікам.
Нагодай стала ўручэнне прадстаўніком Папы копіі даверчых грамат. Падчас сустрэчы былі абмеркаваны актуальныя пытанні двухбаковага парадку дня, пацверджана ўзаемная зацікаўленасць у актывізацыі беларуска-ватыканскага супрацоўніцтва. Сяргей Алейнік пажадаў арцыбіскупу Антэ Ёзічу актыўнай плённай працы ў Рэспубліцы Беларусь, - паведаміла прэс-служба Міністэрства замежных спраў.
Новы Апостальскі нунцый быў прызначаны ў Беларусь 21 мая 2020 г. 53-гадовы ватыканскі дыпламат харвацкага паходжання прыбыў у краіну 11 кастрычніка.
Нагадаем, што Сяргей Алейнік з’яўляецца таксама Надзвычайным і Паўнамоцным Паслом Беларусі пры Святым Пасадзе.
22 кастрычніка 2020, 10:08
