Пантыфікат Францішка даўжэйшы за пантыфікат Бэнэдыкта XVI
“Спражкай” паміж двума пантыфікатамі стала рашэнне Бэнэдыкта XVI у 2013 г. падаць у адстаўку. Гэта наклала адбітак і на яго наступніку. Абодвум Пантыфікам давялося сутыкнуцца з нявырашанай пакуль да канца праблемай рэформ у Ватыкане. Паводле кс. Хагенкорда, выклік настолькі сур’ёзны, што з ім, магчыма, прыйдзецца сутыкнуцца яшчэ і наступнаму Папу.
Хоць у абодвух Пантыфікаў была адна мэта: пераемнасць св. Пятра ў менш уладнай і больш пастырскай форме, езуіт бачыць істотныя адрозненні паміж Папам з Германіі і Папам з Аргентыны. З 2013 г. значна змяніўся стыль – Францішак у асноўным факусуецца на харызме, аўтэнтычнасці і прысутнасці ў сродках масавай інфармацыі, канцэнтруецца на Паўсюдным Касцёле.
“Пачынаючы з папскага імя, Ёзэф Ратцынгер быў класічным еўрапейскім Пантыфікам: ён здзейсніў 24 замежныя паездкі, у тым ліку ў многія краіны нашага кантынента. Францішак да гэтага часу рэалізаваў 31 замежнае падарожжа за фактычна карацейшы на год перыяд, паколькі пандэмія заблакіравала ўвесь 2020 г. У спіс краін, якія наведвае цяперашні Папа, не ўваходзяць найбольш важныя еўрапейскія, такія як Іспанія, Францыя ці Германія, тое ж мы бачым у прызначэннях кардыналаў”, - падкрэсліў кс. Хагенкорд у інтэрв’ю кёльнскаму Domradio. Такім чынам, на яго думку, па меншай меры на ўзроўні Святога Пасаду, Еўропа значна адстала па значнасці з пункту гледжання Паўсюднага Касцёла.
Эксперт прагназуе доўгі пантыфікат Францішка: “нягледзячы на сталы ўзрост і хваробы ў мінулым, Папа не слабы і не стомлены”. На думку былога кіраўніка нямецкамоўнай рэдакцыі Ватыканскага радыё, не зменяцца і асноўныя лініі, як у працягу, так і ў разыходжанні з папярэднім пантыфікатам.
Трэба звярнуць увагу, што з 11 студзеня 2021 г. перыяд прабывання Бэнэдыкта XVI на пенсіі даўжэйшы за час яго кіравання Касцёлам. Яго пантыфікат працягваўся 2873 дні, а пазаўчора мінуў 2874-ы дзень з моманту, калі ён змяніў статус на “Папа-эмерыт”.
Бэнэдыкт XVI, ураджэнец Германіі, быў Пантыфікам з 19 красавіка 2005 г. па 28 лютага 2013 г., калі падаў у адстаўку з Пасаду св. Пятра. У красавіку 2021 г. яму споўніцца 94 гады.
