Новы галоўны арганізатар Міжнародных эўхарыстычных кангрэсаў
Францішак прызначыў старшынёй Папскага камітэта Міжнародных эўхарыстычных кангрэсаў а. Карада Маджоні, ужо былога падсакратара Кангрэгацыі Божага культу і дысцыпліны сакрамэнтаў.
Аляксандр Амяльчэня - Vatican News
Італьянскі законнік-манфартанец змяніў на пасадзе свайго суайчынніка, арцыбіскупа П'ера Марыні, які ўзначальваў структуру з 2007 г.
А. Маджоні – доктар літургікі. Працуе ў структурах Святога Пасаду з 1990 г. Кіраваў Літургічным камітэтам Вялікага юбілею 2000 года. У 2007 г. узначаліў адзін з аддзелаў у Кангрэгацыі Божага культу, з 2013 г. кансультуе Упраўленне папскіх літургічных цэлебрацый. 5 лістапада 2014 г. Францішак прызначыў яго намеснікам сакратара згаданай Кангрэгацыі. Уваходзіць у склад Рады Папскай міжнароднай марыйнай акадэміі, выкладае ў Папскім літургічным інстытуце св. Анзэльма і на Папскім тэалагічным факультэце Marianum.
13 верасня 2021, 12:19
