Арцыбіскуп Шыклуна пра абноўленую версію Vos estis
Аляксандр Амяльчэня - Vatican News
На яго думку, самае важнае змяненне, якое змяшчаецца ў дакуменце, – гэта ўвядзенне дэталёвай працэдуры паведамлення і расследавання абвінавачванняў супраць свецкіх асоб, якія ўзначальваюць міжнародныя касцёльныя асацыяцыі.
Спецыяліст па барацьбе са злоўжываннямі звярнуў увагу на тое, што адбылося злучэнне двух законаў з 2021 года. Два гады таму Францішак абнародаваў новую рэдакцыю партыкулярнага права, у якой пералічваюцца канкрэтныя кампетэнцыі Дыкастэрыі веравучэння, і motu proprio, у адпаведнасці з якім быў перагледжаны раздзел Кодэкса кананічнага права аб крымінальных санкцыях.
Уведзеныя цяпер нормы распаўсюджваюцца не толькі на духавенства і законнікаў, але і на свецкіх асоб, якія з'яўляюцца або ў мінулым былі мадэратарамі міжнародных аб'яднанняў, прызнаных Святым Пасадам. Апублікаваны некалькі дзён таму motu proprio вызначае падрабязную працэдуру паведамлення і расследавання абвінавачванняў супраць касцёльнага кіраўніцтва.
Арцыбіскуп Шыклуна таксама падкрэсліў указанні, якія прысутнічаюць у 5 артыкуле папскага дакумента, дзе гаворыцца аб клопаце аб пакрыўджаных. Адказныя касцёльныя асобы павінны ўзяць на сябе абавязацельства забяспечыць годнае і паважлівае стаўленне да іх і іх сем’яў, каб іх прымалі, выслухоўвалі і суправаджалі адпаведнымі формамі духоўнай, медыцынскай, тэрапеўтычнай і псіхалагічнай дапамогі ў залежнасці ад патрэб.
На пытанне, што змяняе гэты дакумент у частцы адказнасці біскупаў, іерарх адказаў: “Закон – гэта працэдура, якую Папа дае для паведамлення аб злоўжываннях з удзелам касцёльных лідараў і іх расследавання, але сам па сабе ён не змяняе стаўлення, менталітэту і здольнасці рэагаваць. Права застаецца як магчымасцю, так і інструментам, але ад нас залежыць, ці засвоім мы каштоўнасці, замацаваныя ў гэтых палажэннях, і будзем іх прымяніць”, - падкрэсліў арцыбіскуп Шыклуна.
