Святы Пасад: забарона ядзернай зброі – маральны імператыў
Аляксандр Панчанка – Vatican News
“Праз амаль 80 гадоў пасля Хірасімы і Нагасакі і 60 гадоў пасля кубінскага ракетнага крызісу, мы яшчэ не зразумелі ўрок, цудоўна апісаны ў энцыкліцы Яна ХХІІІ Pacem in terris – “ядзерная зброя павінна быць забаронена”, - сказаў мансеньёр Януш Урбанчык падчас сустрэчы, прысвечанай падрыхтоўцы да Канферэнцыі па пераглядзе частак Дамовы аб нераспаўсюджванні ядзернай зброі. Форум адбудзецца ў 2026 годзе.
Дыпламат Святога Пасаду нагадаў словы Францішка пра амаральнасць валодання ядзернымі ўзбраеннямі і неабходнасць умацавання ўзаемнага даверу ў міжнароднай супольнасці праз дыялог, у якім бакі павінны кіравацца агульным дабром, а не абаронай вузкіх інтарэсаў.
Мансеньёр Урбанчык звярнуў увагу на магчымыя катастрафічныя наступствы выкарыстання ядзернай зброі; на выдаткаванне вялізарных фінансавых рэсурсаў на яе мадэрнізацыю і абслугоўванне, якія могуць быць накіраваны на мірныя мэты, развіццё і інтэгральную бяспеку.
Валоданне ядзернымі ўзбраеннямі стварае атмасферу страху і недаверу і нясе рызыку пераходу канвенцыянальных узброеных канфліктаў у канфлікты з выкарыстаннем ядзернай зброі. Прадстаўнік Папы заўважыў, што выпрабаванні такіх узбраенняў забруджваюць навакольнае асяроддзе і робяць вялікія тэрыторыі непрыдатнымі для жыцця на тысячы гадоў. Таму імкненне да ядзернага раззбраення з’яўляецца выклікам, маральным і гуманітарным імператывам і патрабуе этыкі салідарнасці, - падкрэсліў мансеньёр Януш Урбанчык.
