Салезіянін узначаліў Адміністрацыю маёмасці Святога Пасада
Святы Айцец прызначыў салезіяніна Джардана Пічыноці, які дагэтуль займаў пасаду намесніка сакратара Адміністрацыі маёмасці Святога Пасада (APSA), яе старшынёй, - паведаміла 2 кастрычніка 2023 года Зала Друку.
Аляксандр Амяльчэня - Vatican News
Біскуп Нунцыа Галанціна, які кіраваў фінансавай установай з 26 чэрвеня 2018 года, сышоў на пенсію – яму споўнілася 75 гадоў.
Перад працай у структурах Святога Пасада, якую распачаў у студзені 2023 года, ксёндз Пічыноці быў эканомам у салезіянскіх дамах у Лугана і Мілане, кіраўніком некалькіх салезіянскіх фондаў.
Адміністрацыя маёмасці з’яўляецца органам, які адказвае за кіраванне нерухомай і рухомай маёмасцю Святога Пасада і забяспечвае неабходныя рэсурсы для выканання функцый, уласцівых Рымскай курыі, якія яна рэалізуе на карысць партыкулярных Касцёлаў. Яе ўнутраная структура падзелена на тры сферы: кіраванне нерухомасцю, фінансавыя пытанні і паслугі.
02 кастрычніка 2023, 14:22
