Святы Пасад рыхтуе дакумент аб распазнаванні аб’яўленняў

Аляксандр Амяльчэня - Vatican News

Аб гэтым распавёў сайту National Catholic Register кардынал-прэфект Віктар Фернандэс.

Апошні раз Кангрэгацыя веравучэння, якую тады ўзначальваў харвацкі кардынал Франьё Шэпер, выдала агульны дакумент на тэму аб’яўленняў у лютым 1978 года, у апошнія месяцы пантыфікату Паўла VI. У Нормах працэдуры даследавання меркаваных аб’яўленняў і пасланняў акрэсліваецца працэс, які Каталіцкі Касцёл выкарыстоўвае пры вывучэнні такіх выпадкаў.

У дакуменце сцвярджаецца, што абавязкам Касцёла з'яўляецца спачатку ацэнка фактаў, затым дазвол на публічную пабожнасць, калі экспертыза будзе станоўчай, і, нарэшце, рашэнне аб сапраўднасці і звышнатуральным характары падзеі.

У тэксце акрэсліваюцца пазітыўныя і негатыўныя крытэрыі ацэнкі сапраўднасці такіх феноменаў, правілы задзейнічання кампетэнтных касцёльных улад, уключаючы Святы Пасад. У ім падкрэсліваецца, што падчас даследавання фактаў варта праяўляць “выключную асцярожнасць”.