Кардынал Паралін: нунцый служыць дабру Касцёла і міру ў свеце
Аляксандр Панчанка - Vatican News
Урачыстая літургія прайшла 24 жніўня 2024 года ў бернардзінскім касцёле ў горадзе Лежайск у Пшэмысльскай архідыяцэзіі. У ёй бралі ўдзел члены мясцовага епіскапату, Апостальскі нунцый у Польшчы, арцыбіскуп Антоніа Філіпацы, старшыня Папскай касцёльнай акадэміі, арцыбіскуп Сальваторэ Пенак’ё.
Дзяржсакратар пажадаў новаму папскаму дыпламату рупліва захоўваць скарб веры і шчодра дзяліцца яго багаццямі, каб, як добрае зерне, яно прыносіла плёны ў Касцёле і грамадзянскай супольнасці.
Людзям нашага часу, вельмі заблытанага, неабходна абвяшчаць, што Бог прыняў чалавечую прыроду і канчаткова адкупіў яе, назаўсёды ўзяўшы нашу рэчаіснасць пад сваю ўладу. “Таму бескарысныя нашы намаганні па будаўніцтве зямнога горада, калі мы выключаем з яго прысутнасць Бога”, - адзначыў кардынал Паралін.
Іерарх асаблівым чынам падкрэсліў важнасць глыбокага духоўнага жыцця для выканання задання нунцыя. “Гэта служэнне, якое здзяйсняецца для дабра Касцёла і міру ў свеце. Яно будзе настолькі плённым, наколькі моцна будзе падтрымана малітвай і разважаннем над Божым словым”, - дадаў бліжэйшы супрацоўнік Папы.
