Паралін: азіяцкае падарожжа Папы – 12 дзён дыялогу і збліжэння
Аляксандр Амяльчэня - Vatican News
З 2 па 13 верасня 2024 года Папа здзейсніць сваё 45-е апостальскае падарожжа, наведаўшы чатыры краіны Азіі і Акіяніі: Інданезію, Папуа-Новую Гвінею, Усходні Тымор і Сінгапур.
Кардынал Паралін падкрэсліў, што галоўная мэта Пантыфіка – асабістая сустрэча з насельніцтвам краін, якія ён наведае. Гэта адлюстроўвае ключавую тэму пантыфікату Францішка – блізкасць да людзей. Ён імкнецца слухаць, падзяляць цяжкасці і надзеі, несці радасць і суцяшэнне Евангелля.
У Інданезіі, самай вялікай мусульманскай краіне свету, Папа, несумненна, падтрымае міжрэлігійны дыялог і заахвоціць да захавання прынцыпаў Панчасіла, якія спрыяюць узаемапавазе паміж рознымі групамі. Ён выступіць супраць радыкалізму і за ўмацаванне братэрства ў разнастайнасці.
Наведваючы Папуа-Новую Гвінею, якая сутыкаецца з выклікамі беднасці, карупцыі і змены клімату, Францішак не зможа не заклікаць да справядлівасці, увагі да бедных і клопату аб навакольным асяроддзі. Ён імкнецца натхніць змены ў кірунку большай сацыяльнай справядлівасці.
Ва Усходнім Тыморы, які сёлета адзначае 25-годдзе сваёй незалежнасці, Пантыфік падтрымае намаганні па пераадоленні няроўнасці, беднасці і сацыяльных праблем, падкрэсліўшы ролю хрысціянскай веры ў працэсе трансфармацыі грамадства.
У мультыкультурным Сінгапуры Папа сустрэнецца з маладымі людзьмі, якія займаюцца міжрэлігійным дыялогам. Чакаецца, што ён заахвоціць іх стаць лідарамі ў пабудове больш братэрскага і мірнага свету.
Кардынал Паралін таксама адзначыў, што візіт можа ўмацаваць сувязі Святога Пасада з іншымі азіяцкімі краінамі, у тым ліку з Кітаем і Асацыяцыяй дзяржаў Паўднёва-Усходняй Азіі (АСЕАН). У кантэксце сусветных канфліктаў, у прыватнасці ва Украіне і на Блізкім Усходзе, падарожжа Францішка разглядаецца як насенне надзеі, дыялогу і брацтва.
Дзяржсакратар падкрэсліў важнасць асабістых сустрэч і шчырага дыялогу для пабудовы міру, заклікаючы да пошуку агульнага дабра замест эгаістычных інтарэсаў. Ён выказаў спадзяванне на тое, што візіт Папы дапаможа пашырыць міжрэлігійны дыялог, садзейнічаць сацыяльнай справядлівасці і ўмацаваць мір у свеце ў гэты няпросты час.
