Абвешчаны лагатып і дэвіз СДМ 2027 у Сеуле
Аляксандр Амяльчэня - Vatican News
Афіцыйная прэзентацыя адбылася падчас прэс-канферэнцыі, дзе было падкрэслена, што лагатып цесна звязаны з дэвізам сустрэчы: Будзьце адважнымі! Я перамог свет (Ян 16:33), і адлюстроўвае яе галоўную тэму.
У цэнтры лагатыпа размешчаны чырвона-сіні крыж, які сімвалізуе Крыж Перамогі Езуса над светам. Чырвоная лінія, якая падымаецца ўверх, азначае Стварыцеля на небе, у той час як сіняя лінія сімвалізуе Зямлю. Разам яны ўтвараюць Крыж, які ўвасабляе выкананне Божай волі на зямлі.
За крыжам знаходзіцца жоўтае кола, якое сімвалізуе Духа Святога і адлюстроўвае славу Уваскрослага Хрыста, нашае святло і надзею. Цікавым элементам з'яўляецца выкарыстанне карэйскага алфавіта (хангыль) для напісання слова Сеул у традыцыйнай карэйскай каліграфіі. Літары складваюцца ў абрэвіятуру WYD (World Youth Day – Сусветныя дні моладзі).
Арганізатары тлумачаць, што лагатып у цэлым адлюстроўвае маладога чалавека, гатовага несці свой крыж за Езусам. Яго характарызуе моцная, дынамічная вера, якая дазваляе смела выцягнуць рукі да Крыжа і ўстаць на ногі, каб выконваць Божую волю ў гэтым свеце.
У лагатыпе гарманічна выкарыстаны традыцыйныя колеры Карэі. Чырвоны сімвалізуе пакутніцкі дух продкаў, сіні – энергію маладых людзей. Чорны колер азначае няпэўны час будучыні перад маладымі людзьмі, а жоўты сімвалізуе славу Духа Святога і перамогу Хрыста, якая будзе дадзена моладзі.
Варта адзначыць, што па жаданні Папы Францішка, натхненнем для стварэння лагатыпа СДМ у Сеуле стала карціна Гара Інванг пасля дажджу ў Сеуле мастака Чосуна Кіма Джэ Джунсуна (1676-1759), творчасць якога з'яўляецца ўнікальным прыкладам карэйскай культуры.
Такім чынам, лагатып СДМ 2027 года не толькі адлюстроўвае духоўныя аспекты сустрэчы, але і падкрэслівае культурную спадчыну Паўднёвай Карэі, спалучаючы традыцыі і сучаснасць у адзіным сімвале.
