Святы Пасад абвяшчае конкурс сакральнай музыкі
Аляксандр Амяльчэня - Vatican News
Ужо з гэтага тыдня можна падаць заяўку на ўдзел у новай Каталіцкай музычнай прэміі. Як паведамілі 20 верасня 2024 года ў Ватыкане, нядаўна заснаваная ўзнагарода мае на мэце папулярызацыю музыкі і ўшанаванне творчасці хрысціянскіх творцаў на ўсіх мовах свету. Арганізатарам конкурсу выступае Фонд Рамона Панэ пры падтрымцы Дыкастэрыі па камунікацыі.
Ідэя конкурсу была прапанавана кардыналам Оскарам Радрыгесам Марадыягам падчас Сусветных дзён моладзі 2023 года ў Лісабоне. Былы арцыбіскуп Тэгусігальпы ў Гандурасе, які, між іншым, з'яўляецца прафесійным піяністам, дасць старт праекту 27 верасня 2024 года ў Ватыкане, адкрыўшы рэгістрацыйную платформу www.catholicmusicawards.world.
Паводле слоў арганізатараў, праект – не проста конкурс ці спаборніцтва, а магчымасць адзначыць каталіцкую музыку ва ўсіх яе формах выражэння. Абвяшчэнне пераможцаў адбудзецца 29 ліпеня 2025 года ў Рыме падчас Юбілею моладзі ў межах Святога года.
Гэтая ініцыятыва падкрэслівае важнасць музыкі ў духоўным жыцці вернікаў і імкненне Каталіцкага Касцёла заахвочваць творчае самавыяўленне маладых хрысціян з усяго свету. Конкурс абяцае стаць значнай падзеяй у культурным жыцці каталіцкай супольнасці, спрыяючы развіццю сакральнай музыкі і аб'яднанню вернікаў праз мастацтва.
