Ружанец: Папа вяртаецца дадому, дзякуем Богу і Панне Марыі
Марыя Валодзіна - Vatican News
"Святы Айцец вяртаецца дадому. Дзякуем Богу і Панне Марыі за цудоўную навіну, атрыманую з клінікі “Джэмэлі”. Мы з даверам звяртаемся да Панны Марыі, Аздараўлення Хворых і Каралевы Міру. Асабліва працягваем маліцца за Папу Францішка, каб Пан ласкава ахоўваў яго і падтрымліваў у місіі кіраўніка Касцёла", - сказаў у сваім уступным слове мансеньёр Джардана Пічыноці, старшыня Адміністрацыі маёмасці Святога Пасада, які ўвечары 22 cакавіка ўзначаліў Ружанец за выздараўленне Пантыфіка.
Святы Айцец быў шпіталізаваны 14 лютага з вострай дыхальнай недастатковасцю, выкліканай полімікробнай інфекцыяй. Навіна аб яго выпісцы прагучала на прэс-канферэнцыі, якую 22 сакавіка правялі медыкі "Джэмэлі". Пасля выпіскі Папа вернецца ў Дом Святой Марты, дзе яму давядзецца працягваць рэабілітацыю не менш за два месяцы.
Біскуп Пічыноці правёў марыйную малітву перад абразом Марыі, Маці Касцёла, размешчаным на прыступках ватыканскай базілікі. У набажэнстве прынялі ўдзел кардыналы, біскупы, святары, законнікі і законніцы, а таксама сотні вернікаў, многія з якіх трымалі ў руках запаленыя свечкі.
"Ідучы за Паннай Марыяй у таямніцах жыцця Яе Сына, мы таксама вучымся давяраць, спадзявацца і крочыць у святле. Няхай гэтая малітва Святога Ружанца стане для ўсіх нас крыніцай суцяшэння і моцы, дапаможа аднавіць наша імкненне жыць як сапраўдныя хрысціяне, быць вернымі сведкамі Евангелля, прыладамі Божай любові і будаўнікамі міру", - сказаў біскуп Пічыноці.
Пасля разважання над Хвалебнымі таямніцамі, спявання "Salve Regina" і Ларэтанскай літаніі, іерарх заклікаў маліцца аб тым, каб “трываючы ў веры, мы ўзрасталі ў любові і разам ішлі да мэты шчаслівай надзеі”. Напрыканцы набажэнства, вернікі праспявалі традыцыйную малітву "Oremus pro Pontifice" і атрымалі благаслаўленне біскупа Пічыноці.
