Ամենապատիւ Հոգեւոր Տէրը աւարտելով Հռոմի մէջ իր հանդիպումները վերադարձ կը կատարէ Լիբանան
Ռոպէր Աթթարեան - Վատիկան
Տանն Կիլիկիոյ Կաթողիկէ հայոց Կաթողիկոս Պատրիարք Ռաֆայէլ Պետրոս ԻԱ` այսօր 25 նոյեմբերին Հռոմ եւ Վատիկան կատարած մի քանի օրուայ այցելութենէն ետքը վերադարձաւ իր նստավայր Լիբանան։
Հռոմ կեցութեան ընթացքին Ամենապատիւ Հոգեւոր Տէրը մասնակցեցաւ «Միասին, ծառայել սիրով. Ամրապնդել մեր եղբայրական համագործակցութիւնը» խորագիրով միջազգային Քարիթասի համագումարին, որուն առիթով Ֆրանչիսկոս Սրբազան Քահանայապետի որոշումով յայտարարուեցաւ միջազգային Քարիթասի Արտակարգ Յանձնակատարի մը նշանակումը, յանձինս Դոկտոր Փիեր Ֆրանչեսքօ Փինելլիին, որով դադրեցան «Caritas Internationalis»ի մինչ օրս պաշտօնի վրայ բոլոր ղեկավարներուն պաշտօնները։
Ռաֆայէլ Պետրոս ԻԱ հայրապետը վերոնշեալ համագումարի ծիրէն ներս հանդիպում ունեցաւ Կարդինալ Լուիս Անթոնիօ Թակլէի հետ` որ կը մնայ որպէս արտակարգ յանձնակատարի աջակից ու առիթը ունեցաւ ծանօթանալու նորանշանակ յանձնակատարին։ Ան ապա այցելեց եւ հանդիպում ունեցաւ Կարդինալ Լէոնարտօ Սանտրիին հետ, որ յառաջիկայ Յունուար 2023էն, տարիքի բերումով, կը հրաժարի Արեւելեան Եկեղեցիներու Վերատեսչութեան Վերատեսուչի իր պաշտօնէն մինչ անոր պաշտօնը` միշտ Ֆրանչիսկոս Պապին որոշումով, կը ստանձնէ Գերապայծառ Քլաուտիօ Կուճերոթթին, որ եղած է Հայաստանի մօտ Սուրբ Աթոռի առաջին Պապական Նուիրակը։
Ամենապատիւ Հոգեւոր Տէրը ապա Լեւոնեան Ք. Վարժարանէն ներս ունեցաւ տարբեր հանդիպումներ, բարեսիրական հաստատութիւններու պատասխանատուներու հետ, քաղաքացիական ընկերակցութիւններու ներկայացուցիչներուն հետ եւ այցելեց նաեւ ՀՀ Սուրբ Աթոռի մօտ դեսպանատունը, հանդիպում ունենալով Դեսպան Կարեն Նազարեանի հետ ու անոր հետ քննարկելով Վատիկան-Հայաստան փոխյարաբերութիւններու վերաբերող հարցեր։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
