Լիբանանի մէջ Ռուսաստանի Դեսպանը այցելութիւն տուաւ Ռաֆայէլ Պետրոս ԻԱ-ին
Վատիկան Նիուզ - Հայկական Բաժանմունք
Տանն Կիլիկիոյ Կաթողիկէ հայոց Կաթողիկոս Պատրիարք Ռաֆայէլ Պետրոս ԻԱ Մինասեան` երեքշաբթի` 7 փետրուարին հայ կաթողիկէ պատրիարքութենէն ներս ընդունեց Լիբանանի մէջ Ռուսաստանի դեսպան` Տիար Ալեքսանդր Ռուդակովին, ի ներկայութեան Պատրիարքի Պէյրութի թեմին օգնական եպիսկոպոս գերապայծառ Գէորգ Ասատուրեանի, Պատրիարքի քարտուղար Հայր Նարեկ Մնոյանի, Երիտասարդներու յանձնախումբի պատասխանատու Հայր Արամ Սաատոյի եւ Տէր Կարապետ քահանայ Թադէոսեանի, ու Պատրիարքարանի արտաքին յարաբերութիւններու քարտուղար Տիար Շարպել Պասթուրիի։
Այցը տեղի ունեցաւ պատրիարքարանի և Լիբանանի մէջ Ռուսաստանի դեսպանութեան միջև յարաբերութիւններու ծանօթութեան և ամրապնդման շրջանակի ծիրէն ներս։
Մէկ ժամ տեւած հանդիպումի ընթացքին կողմերը խօսեցան Ռուսաստանի և Հայաստանի միջեւ տիրող յարաբերութիւններու և Հայաստանին Ռուսաստանի ցուցաբերած աջակցութեան մասին՝ երկրին տարբեր մարտահրաւէրներու ընթացքին։
Քննարկուեցաւ նաեւ Ռուսաստանի Դաշնութեան մէջ Հայ Կաթողիկէ եկեղեցւոյ ներկայութիւնը ու անոր ընկերութեան մատուցած կարեւոր դերը։
Հանդիպման առիթով Ամենապատիւ Հոգեւոր Տէրը բարձր գնահատեց Ռուսաստանի դերն ու աջակցութիւնը բազմաթիւ երկիրներու ու եկեղեցիներու, յատկապէս Սուրիայի Արաբական Հանրապետութեան մէջ, Ան ապա մաղթեց, որ ռուս ժողովուրդը վայելէ խաղաղութիւնը, իսկ ճգնաժամերն ու պատերազմները վերջ գտնեն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
