Ֆրանչիսկոս Պապ օդակայան մեկնելէն առաջ հանդիպեցաւ Ուքրանացի գաղթական երեք ընտանիքներու հետ

Վազգէն Աբարդեան - Վատիկան

Դէպի Պահրէյն առաքեալկան ճամբորդութեան սկիզբը, Ֆրանչիսկոս Պապ, Հինգշաբթի, 3 նոյեմբերին, առաւօտեան, նախ քան Հռոմի միջազգային օդակայան փոխադրուիլը, Վատիկանի Սանթա Մարթա տան մէջ հանդիպեցաւ Իտալացիներու մօտ հիւրընկալուած Ուքրանացի գաղթական երեք ընտանիքներու հետ, որոնց ընկերացած էր, քահանայապետական ողորմնաբաշխ կարդինալ Քրաժեվսքին։

Առաջին ընտանիքը կազմուած է 18 եւ 14 տարեկան երկու զաւակներու տէր երեցկինով մը, որուն քահանայ ամուսինն ու մեծ զաւակը Ուքրանիա մնացած են։

Երկրորդ ընտանիքը, Զափորիժայի քաղաքէն փախած 30 տարեկան մայր մըն է իր 4 եւ 7 տարեկան զաւակներով։

Իսկ երրորդ ընտանիքը Քիեւէն գաղթած 53 տարեկան կին մը, հաշմանդամութիւն ունեցող 13 տարեկան իր զաւակով ու 73 ամեայ տարեց մայրով։