Ֆրանչիսկոս Պապին ողջոյնի խօսքը վեց Յունուարի Մարեմեան աղօթքի աւարտին
Ռոպէր Աթթարեան - Վատիկան
Ուրբաթ 6 Յունուար 2023ի կէսօրին, իր գրասենեակի պատուհանէն արտասանած Հրեշտակ Տեառն Մարեմեան աղօթքի աւարտին Ֆրանչիսկոս Սրբազան Քահանայապետը խօսքը ուղղելով աղօթքի առիթով հրապարակ ժամանած ուխտաւորներուն, յատուկ շնորհաւորութիւններ յղեց բոլոր այն Արեւելեան Եկեղեցիներուն, ըլլան կաթողիկէ կամ օրթոտոքս, որոնք վաղը կը տօնախմբեն Տիրոջ Սուրբ Ծննդեան տօնը։
Աղօթենք խաղաղութեան համար
«Մասնաւորապէս այս մէկը կ՜ուզեմ որ հասանելի ըլլայ ուքրանացի մարտիրոս ժողովուրդին եղբայրներուն եւ քոյրերուն» ըսաւ Սրբազան Պապը։ Փրկչին ծնունդը թող զեղու մխիթարութիւնը, զեղու յոյս եւ ներշնչէ գործնական քայլեր, որոնք վերջապէս կարողանան առաջնորդել հակամարտութիւններու աւարտին եւ խաղաղութեան։ Շատ աղօթենք Ուքրանիոյ համար եւ խաղաղութեան համար» ըսաւ Ֆրանչիսկոս Պապը։
Միսիոներ մանկութեան օրը
Ան ապա յիշեց`որ Աստուածայայտնութեան տօնին օրը կը յիշատակուի «Պատանիներու միսիոներական համաշխարհային օրը», ողջունելով բոլոր պատանիները, որ աշխարհի տարբեր վայրերուն մէջ կը տարածեն Յիսուսին բարեկամներ ըլլալու ուրախութիւնը եւ յանձնառու են, աղօթքով, զոհողութիւններով եւ նուիրումով աջակցելու Աւետարանի առաքեալներուն։
Կեցցէ Պեֆանան
Սրբազան Պապը հուսկ ողջունեց հրապարակ խմբուած տարբեր երկիրներէ ժամանած բոլոր ուխտաւորները յատուկէն ողջունելով «Կեցցէ Պեֆանան» ձեռնարկի մասնակցողները, եւ Ֆոլինիօ քաղաքի քաղաքական ու եկեղեցական իշխանութիւնները, ողջոյն ուղղելով նաեւ Լեհաստանի տարբեր քաղաքներուն մէջ «Մոգերու Երթին» մասնակցողներուն, Ան ապա բոլորին մաղթեց բարի տօնակատարութիւն ինչպէս միշտ խնդրելով, որ չի մոռնան աղօթելու իրեն համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
