ֆրանչիսկոս Պապ հրաւիրեց աղօթել Եկեղեցիներու միութեան աղօթքի շաբթուան համար։
Վազգէն Աբարդեան - Վատիկան
Չորեքշաբթի, 18 յունուարին, հրապարակային ունկնդրութեան աւարտին, Ֆրանչիսկոս Պապ ողջունելով Իտալացի եւ օտարերկրեայ ուխտաւորները, Իտալացիներու յղած ողջոյնի խօսքին մէջ հրաւիրեց աղօթելու քրիստոնեաներու միութեան աղօթքի շաբթուան սկիզբը, որպէսզի Քրիստոսի մէջ բոլոր հաւատացեալներու մէջ միշտ հաստատուի դէպի լիակատար հաղորդութեան ուղեւորութիւնը, խնդրեց նաեւ ամբողջական նուիրումով եւ կեանքի իւրաքանչիւր միջավայրէն ներս, ամէն ջանք թափել խաղաղութեան եւ հաշտութեան կառուցողները դառնալու համար։
Ֆրանչիսկոս Պապ խնդրեց նաեւ աղօթել Ուքրանիոյ համար
«Չմոռնանք աղօթելու Ուքրանիոյ համար, որ կարիքը ունի մօտիկութեան, մխիթարութեան ու յատկապէս խաղաղութեան» ըսաւ Սրբազան Հայրը, Ան ապա յիշելով անցեալ շաբաթ օր տեղի ունեցած հրթիռային յարձակումը, որուն հետեւանքով մահացած են նաեւ մանուկները, իր խոր վիշտը յայտնեց մահացած մանուկներուն ընտանիքներուն դիտել տալով, որ այդ ողբերգական դրուագին վկայութիւնները ու պատկերները զօրաւոր կոչ է բոլոր խիղճերուն եւ չէ կարելի անտարբեր մնալ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
