Ունկնդրելը, միասին քալելը և վկայելը կը դրոշմեն Եկեղեցւոյ սիւնհոդական ուղեւորութիւնը. Ֆրանչիսկոս Պապ

Մարիամ Երեմեան – Վատիկան

Ֆրանչիսկոս Սրբազան Քահանայապետ այսօր՝ 6 մարտին, ընդունեց Քլիվըլենտի (Օհայօ - ԱՄՆ) «Saint Mary - Սուրբ Մարիամ» Ճեմարանի քահանաները, սարկաւագները, ճեմարանականները, ուսուցիչները և անձնակազմը՝ Ճեմարանի հիմնադրման 175ամեակի կապակցութեամբ:

«Առիթը բարենպաստ է շնորհակալութիւն յայտնելու Աստուծոյ՝ ձեր հաստատութեան կողմէ այս տարիներու ընթացքին մեծ թիւով քահանաներ կազմաւորելու համար», ըսաւ անոնց ուղղած իր պատգամին սկիզբը Պապը և Եկեղեցւոյ սինոդալ գործընթացը բնորոշող իր երեք մտորումները կիսեց անոնց հետ՝ ընդգծելով, որ այդ յատկանիշները կարևոր են նաև ապագայ քահանաներ և Աւետարանի սպասաւորներ պատրաստուելու համար:

Ունկնդրութիւն

Ունկնդրութիւնը՝ եւ յատկապէս Տիրոջ ունկնդրութիւնը», Ֆրանչիսկոս Պապի առաջին մտորումը եղաւ: «Գիտենք, որ միայնակ ոչինչ կարող ենք ընել, քանի որ. «Եթէ Տէրը չ'շինէ տունը՝ ի զուր կ՛աշխատին անոր շինողները» (Սաղմոս 127։1), յարեց Ան և յորդորեց երբեք չմոռնալ Տիրոջը ձայնը լսելու և Անոր կամքը հասկնալու կարեւորութիւնը ներքին աճի համար, յատկապէս, երբ հրատապ և դժուարին գործերու առջեւ ենք։

Միևնոյն ժամանակ, ըստ Նորին Սրբութեան, Տիրոջը լսել կը նշանակէ թէ «հաւատքով արձագանքել այն ամենին, ինչ Ան յայտնած է, իսկ Եկեղեցին կը հաղորդէ, որպէսզի դուք կարողանաք ուսուցանել և աւետել ուրիշներուն Աւետարանի ճշմարտութիւնն ու գեղեցկութիւնը իրական և ուրախ ձևով»:

Միասին քալել

Սինոդալ ուղեւորութեան երկրորդ յատկանիշը՝ առաջարկուած Սրբազան Քահանայապետի կողմէ, միասին քալելն է։ Ան խրախուսեց Ճեմարանի մէջ կազմաւորման ժամանակը օգտագործել՝ խորացնելու եղբայրական հաղորդութիւնը ինչպէս իրարու միջեւ, այնպէս ալ տեղի ու համամիութենական և Եկեղեցւոյ հետ, աշխարհական հաւատացեալներու հետ՝ որպէս մէկ մեծ ժողովուրդի մաս մը և շեշտեց. «ձեր կոչումը պարգև է, որ պիտի ծառայէ Քրիստոսի մարմնի շինութեան համար (հմմտ. Եփեսացիս 4:12)»:

Վկայութիւն

«Թող` որ Ճեմարանի մէջ ուսումի տարիները պատրաստեն ձեզի ամբողջովին նուիրուելու Աստուծոյ և Անոր Սուրբ ժողովուրդին՝ կուսակրօն սիրով և անբաժան սրտով: Եկեղեցին ձեր խանդավառութեան, առատաձեռնութեան և եռանդի կարիքն ունի՝ ցոյց տալու բոլորին, որ Աստուած միշտ մեզի հետ է, կեանքի բոլոր պարագաներուն», շեշտեց ի վերջոյ Նորին Սրբութիւնը՝ անդրադառնալով սինոդալ ուղեւորութեան երրորդ յատկանիշին, որ է վկայութիւնը: Ան յորդորեց ըլլալ դէպի դուրս Եկեղեցւոյ վկաները և Յիսուսի ողորմած սէրը կիսել մարդկային ընտանիքի բոլոր անդամներու՝ յատկապէս աղքատներու եւ կարիքաւորներու հետ:

«Սիրելի բարեկամներ, ունկնդրելը, միասին քայլելը և վկայելը կը դրոշմեն Եկեղեցւոյ սիւնհոդոսական ուղեւորութիւնը, ինչպէս նաեւ դէպի քահանայական ձեռնադրութիւն ձեր ուղեւորութիւնը», նշեց աւարտին Սրբազան Քահանայապետը վստահելով զանոնք Ճեմարանի հովանաւոր Մարիամ Աստուածածնի մայրական բարեխօսութեանը՝ խնդրելով նաեւ որ աղօթեն իրեն համար