Ֆրանչիսկոս Պապին նախագահութեամբ «24 ժամ Տիրոջ համար» աղօթքի ձեռնարկը Սանթա Մարիա Տէլլէ Կրացիէ եկեղեցւոյ մէջ։

Վազգէն Աբարդեան - Վատիկան

Մօտ օրէն պիտի կատարուի «24 ժամ Տիրոջ համար» պահքի շրջանի աղօթքի եւ ապաշխարութեան ձեռնարկը, խնդրուած Ֆրանչիսկոս Պապին կողմէ։

Աղօթքի ձեռնարկը տեղի կ՝ունենայ աշխարհի բոլոր թեմերէն ներս, Քառասնորդացի 4-րդ կիրակիի նախօրէին, ուրբաթ 17էն մինչեւ շաբաթ 18 մարտ։

Ի պատրաստութիւն Զատկուայ տօնին, եկեղեցիներու դռները ամբողջ օր բաց կը մնան հաւատացեալներուն եւ ուխտաւորներուն առջեւ, հնարաւորութիւն շնորհելու համար՝ աղօթելու կամ խոստովանանքի խորհուրդին մասնակցելու։

Սուրբ Աթոռի Աւետարանումի վերատեսչութեան հրապարակած հաղորդագրութեան համաձայն, այս տարի, Ֆրանչիսկոս Պապ «24 ժամ Տիրոջ համար» ձեռնարկը պիտի գլխաւորէ, Հռոմի Թրիոնֆալէ շրջանին մէջ գտնուող «Սանթա Մարիա տէլլէ Կրացիէ» եկեղեցիէն ներս, որուն ընթացքին հաւատացեալները առիթը պիտի ունենան մասնակցելու խոստովանանքի խորհուրդին։

Ի պատրաստութիւն «24 ժամ Տիրոջ համար» աղօթքի ձեռնարկին, լոյս տեսաւ փոքրիկ գրկոյք մը, որուն մէջ պարունակուած են անձնական աղօթքներ եւ առաջարկներ։