«Աղքատներուն հետ եւ Աղքատներուն համար»․ Ֆրանչիսկոս Պապի պատգամը՝ Սուրբ Ծննդեան առթիւ համերգին կազմակերպիչներուն

Մարիամ Երեմեան - Վատիկան

Այսօր՝ 15 Դեկտեմբեր 2023ին, Ֆրանչիսկոս Սրբազան Քահանայապետը Վատիկանի «Քլեմենթինա» անուան դահլիճին մէջ ունկնդրութիւն շնորհեց Սուրբ Ծննդեան կապակցութեամբ կազմակերպուած համերգի կազմակերպիչներուն, որուն այս տարուայ բնաբան է «Աղքատներուն հետ եւ Աղքատներուն համար»։

Նշենք թէ հանդիսութիւնը պիտի կայանայ կրկին այսօր՝ յետմիջօրէին, Պօղոս Զ դահլիճէն ներս։ Այդ առթիւ Սուրբ Աթոռի Բարեգործական Ծառայութեան Վերատեսչութիւնը երեք հազար մարդ հրաւիրած է՝ անոնց մէջ անօթեւաններ, գաղթականներ եւ աղքատներ։

Աւանդական դարձած համերգը՝ թիւով արդեն չորրորդը, այս տարի պիտի կատարեն «Հռոմի օփերային թատրոնի» նուագախումբը ու երգչախումբը՝ ղեկավար Գերապայծառ Մարքօ Ֆրիզինա, Հռոմի թեմի երգչախումբի երկու հարիւր անդամներու հետ միասին՝ ղեկավար Սփերանցա Սքափփուչչի։

Ֆրանչիսկոս Պապը վերոնշեալ համերգի կազմակերպիչներուն ուղղած իր պատգամին սկիզբը շնորհակալութիւն յայտնեց․ «որովհետեւ այդքան շատ մարդկանց ներգրաւելով» կրցած են «ձրի համերգ առաջարկել հազարաւոր ընչազուրկ անձերու»։ Ան ապա աւելցուց, որ․ «երաժշտութեամբ եղբայրութիւն առաջարկելը (…) շատ համահունչ է Սուրբ Ծննդեան պատգամին հետ»:

«Աւելի դիւրին է ներդաշնակութիւն գտնել ձայնանիշերուն հետ, քան անձերուն,․․․, որ սակայն ձեր պարագան չէ» ներկաներուն հաստատեց Նորին Սրբութիւնը եւ յատուկէն անդրադարձաւ բնաբանի՝ «համար» եւ «հետ» բառերուն՝ ըսելով թէ․ կը սկսինք «համար»էն՝ որ հասնինք «հետ»ին։ Այսինքն «երբ իմ կողմէ ինչ-որ բան տալը միւսին համար կը դառնայ ստանալ, իրարու մէջ բաժնել, ընկերութիւն է», նկատել տուաւ Ան եւ խնդրեց աղօթել, որպէսզի այդ մէկը իրականանայ. «երաժշտութիւնը, չէ բաւէր, չեն բաւեր լոյսերը զարդարանքները, հարկաւոր է աղօթք»։

Նորին Սրբութիւնը հուսկ խօսքը աւարտեց՝ հայցելով Տիրամօր բարեխօսութիւնը, ապա խնդրեց աղօթել նաեւ իրեն համար կամ, ինչպէս Ինք ըսաւ, «գէթ բարի ալիքներ ուղարկել», որոնք «այնքան անհրաժեշտ են այս աշխարհին»։