Ֆրանչիսկոս Պապին այցելութիւնը Հռոմի Քաղաքապետարան
Ռոպէր Աթթարեան - Վատիկան
Երկուշաբթի 10 Յունիսի առաւօտեան ժամը 8,40ին, Ֆրանչիսկոս Պապը Տոմուս Սանթա Մարթայէն մեկնելով ուղղուեցաւ դէպի Հռոմի Քաղաքապետարան, ուր նախատեսուած էր Անոր պաշտօնական այցելութիւնը։
Այս երկրորդ անգամն է որ Սրբազան Քահանայապետը կ՛այցելէ Քամփիտոլիոն` Հռոմի Քաղաքապետարանը, 2019ի Մարտի 26ին կատարած վերջին այցելութենէն ետքը։
«Քամփիտոլիօ» ժամանելուն Սրբազան Քահանայապետը դիմաւորուեցաւ Հռոմի Քաղաքապետ Տիար Ռոպերթօ Կուալթիերիի կողմէ ապա անոնք միասնաբար կանգ առին Հռոմէական ֆորումին նայող առաջին կամարի մօտ հուսկ վերելակով բարձրացան «Սենատորական» Պալատի առաջին յարկ, ուր տեղի ունեցաւ Սրբազան Պապին ու Քաղաքապետին միջեւ առանձնազրոյց մը, որուն աւարտին Քահանայապետը ողջունեց նաեւ Քաղաքապետի ընտանեկան պարագաները հուսկ Քաղաքապետի քարտուղարութեան գրասենեակի պաշտօնեաները։
Դրօշակներու դահլիճին մէջ ստորագրելէ ետք Քաղաքապետարանի «Ոսկեմատեանը» Սրբազան Քահանայապետը «Ճուլիօ Չեզարէ» դահլիճին մէջ հանդիպեցաւ Հռոմի Քաղաքապետարանի աւագանի անդամներուն, խորհրդականներուն և հրաւիրուած այլ իշխանութիւններուն եւ Քաղաքապետական Խորհրդարանի նախագահ Զվեթլանա Չելիի ու Քաղաքապետ Ռոպերթօ Կուալթիերիի բարի գալուստի խօսքերէն ետքը Սրբազան Քահանայապետը իր պատգամը ուղղեց ներկաներուն։
Հանդիպման աւարտին տեղի ունեցաւ նուէրներու փոխանակում որոնց շարքին Սրբազան Պապը նուիրեց նաեւ Յոբելենական Տարւոյն յայտարարութեան կոնդակը հուսկ Նորին Սրբութիւնը «Սենատորական Պալատի» պատշգամէն ողջունեց «Քամփիտոլիօ» հրապարակին վրայ գտնուող Հռոմի քաղաքացիները, հրաւիրելով զանոնք միասնաբար աղօթելու «Ողջոյն քեզ Մարիամ» աղօթքը, «մեր քաղաքին համար» ըսաւ Սրբազան Պապը։
Վատիկան վերադարձէն առաջ Սրբազան Քահանայապետը Քաղաքապետին հետ միասին պահ մը կանգ առաւ այս այցելութիւնը յիշատակող յուշակոթողին դիմաց ապա «Փրոթոմոթեքա» դահլիճ ուղղուելով ողջունեց Քաղաքապետարանի պաշտօնեաները, զանոնք եւս հրաւիրելով աղօթելու Ողջոյն քեզ Մարիամ աղօթքը, Հռոմի համար։
Սրբազան Պապը շնորհակալութիւն յայտնեց անոնց Քաղաքին ի սպաս կատարած աշխատանքին համար ապա խնդրեց` որ չմոռնան իրեն համար աղօթելու։ «Ի նպաստ» ըսաւ Սրբազան Պապը ժպիտով, ապա հրաժեշտ առնելէ ետք Քաղաքապետէն ուղղուեցաւ դէպի իր նստավայրը` Վատիկան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
