Ֆրանչիսկոս Պապին Թրիեսթէ քաղաքին հովուական այցելութեան յայտագիրը
Ռոպէր Աթթարեան - Վատիկան
Յառաջիկայ 7 Յուլիս 2024ին Ֆրանչիսկոս Սրբազան Քահանայապետը հովուական այցելութիւն պիտի կատարէ Թրիեսթէ քաղաք, փակումը կատարելու համար «Իտալիոյ կաթողիկէներու ընկերային 50րդ շաբաթուան»։
Նորին Սրբութիւնը Վատիկանէն կը մեկնի ինքնաթիռով ու մէկ ու կէս ժամ տեւած թռիչքէ մը ետք առաւօտեան ժամը 8ին կը ժամանէ Թրիեսթէ քաղաքի «Generali Convention Center» կեդրոն, ուր կը դիմաւորուի Կարդինալ Մաթթէօ Ծուփիի կողմէ `Իտալիոյ Եպիսկոպոսներու համահաւաք դասի նախագահը ընկերակցութեամբ Գերապայծառ Լուիճի Ռեաննայի` Քաթանիա քաղաքի Արքեպիսկոպոս եւ Ընկերային Շաբաթներու կազմակերպիչ յանձնախումբի նախագահ, Գերապայծառ Էնրիքօ Թրեվիզի` Թրիեսթէ քաղաքի Եպիսկոպոս ապա «Friuli Venezia Giulia» Մարզի նախագահ` Տիար Մասսիմիլիանօ Ֆրետրիքա, Թրիեսթէ քաղաքի ոստիկանապետ Տիար Փիեթրօ Սինորիելլօ, Թրիեսթէի քաղաքապետ Տիար Ռոպերթօ Տիփիացցա, եւ «Generali» ընկերութեան գլխաւոր գործադիր տնօրէն` Տիար Ֆիլիփ Տոննէ։
Նորին Սրբութիւնը հուսկ համաժողովներու կեդրոնին մէջ կը հանդիպի ժողովականներուն, որոնց կ՛ուղղէ ճառ մը, որմէ ետք ժողովականները կը փոխադրուին «Piazza Unità d’Italia» հրապարակ մինչ Ֆրանչիսկոս Պապը հակիրճ հանդիպումներ կ՜ունենայ որոշ անձնաւորութիւններու հետ, որոնց շարքին` համամիութենական շարժումի ներկայացուցիչներ, ակադեմիական աշխարհի անդամներ ապա գաղթականներ եւ անկարներ։
Ժամը 10, 30ին Նորին Սրբութիւնը «Իտալիոյ միութեան» հրապարակին շրջանը կատարելէն ետքը նոյն վայրին մէջ կը մատուցէ սուրբ պատարագ, որուն ընթացքին կը ներկայացնէ օրուան քարոզը ու աւարտին կ՛աղօթէ Հրեշտակ Տեառն Մարեմեան աղօթքը։
Նախ քան վերջին օրհնութիւնը Նորին Սրբութեան շնորհակալութեան խօսք կ՛ուղղէ Գերապ. Էնրիքօ Թրեվիզին։
Սրբազան Պապին մեկնումը Թրիեսթէ քաղաքէն նախատեսուած է 12,30ին իսկ ժամանումը Վատիկան ժամը 14ին։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
