Հրատարակուեցաւ Ֆրանչիսկոս Պապին Լիւքսեմպուրկ եւ Պելճիքա կատարելիք ճամբորդութեան պաշտօնական յայտագիրը

Ռոպէր Աթթարեան - Վատիկան

Յառաջիկայ 26 – 29 սեպտեմբեր 2024 ին Ֆրանչիսկոս Պապը առաքելական ճամբորդութեամբ պիտի մեկնի Լիւքսեմպուրկ ապա Պելճիքա։ Այսօր ուրբաթ 19 Յուլիս 2024ին Սուրբ Աթոռի Մամլոյ գրասենեակը հրատարակեց ճամբորդութեան յայտագիրը, որուն մէջ նշուած է որ Սրբազան Պապը Հռոմէն պիտի մեկնի Հինգշաբթի 26 սեպտեմբերի առաւօտեան ուղղուելով Լիւքսեմպուրկ, ուր կը ժամանէ գրեթէ երկու ժամ տեւող թռիչքէ մը ետք, եւ օդակայանին մէջ կայացած Բարի Գալուստի պաշտօնական արարողութենէն ետքը, Ան քաղաքավարական այցելութիւն կու տայ Լիւքսեմպուրկի Մեծ Դուքսին` Դքսութեան Պալատէն ներս։

Սրբազան Պապը հուսկ կը հանդիպի Լիւքսեմպուրկի Վարչապետին ապա Երկրի քաղաքական իշխանութիւններուն, քաղաքական ընկերութեան ու դիւանագիտական մարմնի անդամներուն հետ անոնց ուղղելով ճառ մը։

Նոյն օրը կէսօրէն ետքը նախատեսուած է Նորին Սրբութեան Կաթողիկէ Հասարակութեան հետ հանդիպումը Լիւքսեմպուրկի «Նոթր Տամ» Աթոռանիստ Տաճարին մէջ, ուր Ան ներկաներուն պիտի ուղղէ իր սրտին խօսքը ու հանդիպումի աւարտին պիտի ուղղուի օդակայան եւ այնտեղ կայացած հրաժեշտի արարողութենէն ետքը պիտի ուղղուի ճամբորդութեան երկրորդ հանգրուան հանդիսացող Պրիւքսէլ քաղաք, ուր կը ժամանէ երեկոյեան ժամը եօթի ժամանակները։

Պելճիքա 

Քահանայապետին Պելճիքայի առաքելական ճամբորդութեան օրակարգը սկիզբ կ՛առնէ երկրորդ օրը` Ուրբաթ, 27 սեպտեմբերին, Երկրին Թագաւորին տուած փրոթոքոլային այցելութեամբ, որմէ ետքը Ան հանդիպում կ՛ունենայ Պելճիքայի Վարչապետին հետ ապա պատկան իշխանութիւններուն հետ, անոնց ուղղելով ճառ մը։

Կէսօրէն ետքը Նորին Սրբութիւնը «Katholieke Universiteit Leuven»ի «Promotiezaal» սրահին մէջ հանդիպում պիտի ունենայ Համալսարանի Ուսուցչական կազմին հետ անոնց ուղղելով իր պատգամը։

Շաբաթ` 28 սեպտեմբերին, Նորին Սրբութիւնը կը հանդիպի Երկրի եպիսկոպոսներուն, քահանաներուն, սարկաւագներուն, կրօնաւոր կրօնաւորուհիներուն, նորընծաներուն ու հովուական ծառայութեան գործիչներուն հետ, «Koekelberg»ի Սուրբ Սիրտ Պազիլիքային մէջ։ Ապա կէսօրէն ետքը Լուվէնի կաթողիկէ համալսարանին մէջ հանդիպում կ՛ունենայ Համալսարանի աշակերտներուն հետ, մինչ երեկոյեան նախատեսուած է Անոր Յիսուսեան միաբանութեան եղբայրակիցներուն հետ հանդիպումը։

Կիրակի` 29 սեպտեմբեր 2024ին, ճամբորդութեան վերջին օրը Սրբազան Քահանայապետը պատարագ կը մատուցէ «Re Baldovino» մարզադաշտին մէջ, նոյն վայրէն արտասանելով Հրեշտակ Տեառն Մարեմեան աղօթքը, որով կ՛եզրափակուի առաքելական ճամբորդութիւնը։