Ֆրանչիսկոս Պապ ընդունեց Միացեալ Նահանգներու մէջ Կազմակերպութիւններու համայնքներու ղեկավարները
Վազգէն Աբարդեան - Վատիկան
Չորեքշաբթի, 28 օգոստոսին, յետմիջօրէին, ԱՄՆ-ի Կազմակերպութիւններու համայնքներու ղեկավարները, Վատիկանի «Սանթա Մարթա» անուան տան մէջ հանդիպեցան Ֆրանչիսկոս Քահանայապետին հետ։ Հանդիպումին նպատակն է Նորին Սրբութեան հետ կիսել ԱՄՆ-ի Կազմակերպութիւններու համայնքներու ղեկավարներու (RECOR) ուղեգիծը եւ խորհրդակցիլ ձեռնարկուելիք քայլերու մասին։
Քահանաներէն, աշխարականներէ կազմուած կազմակերպութեան 20 պատասխանատուները, Նորին Սրբութեան ներկայացուցին Կազմակերպուած համայնքներու նոր եկեղեցական ցանցը, որ կաթողիկէ եպիսկոպոսներու առաջնորդութեամբ, կը փափաքի առաջատար դերս ստանձնել Եկեղեցւոյ ընկերային վարդապետութեան կազմաւորման եւ իրականացման մէջ նպատակ ունենալով երաշխաւորել «Ապրելակերպ մը Աւետարանի համով»։
Ֆրանչիսկոս Պապին հետ հանդիպումը
Հանդիպումին ընթացքին Ֆրանչիսկոս Պապ քաջալերած է ղեկավարները կառուցելու սիւնոդական կամուրջ մը, «որպէսզի մեր ժողովուրդները կեանք ունենան» ու բարձր գնահատած է ժողովուրդի մը կազմակերպուած ըլլալու կարողութիւնը։ «Ժողովուրդի մը հարստութիւնը կը գտնուի իր կազմակերպուած ըլլալու կարողութեան մէջ» ըսած է Սրբազան Հայրը ապա յիշած Պօղոս Զ Պապին այն խօսքը որ կ՝ըսէր, թէ քաղաքականութիւնը, եղբայրսիրութեան ամենէն զօրաւոր արտայայտութիւնն է։ Ֆրանչիսկոս Պապ քաջալերած է նաեւ յառաջ երթալու, աշխատելու եւ երբեք անտարբեր չմնալու։
Յայտնենք, թէ եկեղեցական ցանը կազմուած է եկեղեցիներէ, համալսարաններէ, տարբեր կազմակերպութիւններէ՝ Կաթողիկէներու մեծամասնութեամբ, ինչպէս նաեւ բողոքական եկեղեցիներէ, սինակոկներէ եւ մզկիթներէ։
Կազմակերպուած համայնքներ
Կազմակերպուած համայնքները աշխատաւորներու քաղաքային, համայնքային կազմակերպութիւններ են, կազմուած ներքին եւ արտաքին գաղթականներէ, որոնք մէջ ամբողջ համայնքը, իր կաթողիկէ եպիսկոպոսներու առաջնորդութեամբ, կը ստանձնէ Եկեղեցւոյ ընկերային վարդապետութեան կազմաւորման եւ կիրարկման մէջ առաջատար դեր։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
