Ֆրանչիսկոս Պապ. Երկխօսութեան քաջութիւն՝ ատելութիւնն ու պատերազմը յաղթահարելու համար։
Վազգէն Աբարդեան - Վատիկան
Լոյս տեսաւ Ֆրանչիսկոս Պապի ստորագրութիւնը կրող նախաբանով «Սան Էճիտիօ» բարեսիրական հասարակութեան հիմնադիր, Անտրէա Ռիքարտիի «Խաղաղութեան խօսքեր» վերնագիրով հատորը, որ կը պարունակէ Սան Էճիտիօ հասարակութեան հիմնադիրին ճառերը՝ արտասանած Ասիզզիի մէջ ամեն տարի կազմակերպուած խաղաղութեան համար միջկրօնային հանդիպումին ընթացքին։
Յիշենք, որ Ասիզզի մէջ միջկրօնական միջազգային խաղաղութեան համար հանդիպումը հիմնուած է 1986ին, Յովհաննէս Պօղոս Բ-ի կամքով։
Նախաբանին մէջ Ֆրանչիսկոս Պապ կը նշէ, թէ «Խաղաղութեան համար խօսքեր» վերնագիրով հատորը կը վկայէ այն երկար ուղեւորութիւնը, որ կ՝ընթանայ 1986ին, Ասիզզի մէջ Յովհաննէս Պօղոս Բ-ի կամքով խաղաղութեան համար միջկրօնական հանդիպումէն մինչեւ մեր օրերը ու Անտրէա Ռիքարտիի յօդուածներու հաւաքածոյին միջոցաւ կը զգացուին ներկայ ժամանակուան խնդիրները, պատերազմի սպառնալիքները ու խաղաղութեան ակնկալիքները։
Ֆրանչիսկոս Պապ ապա անդրադառնալով ամէն տարի Ասիզզի մէջ կազմակերպուած խաղաղութեան համար միջ կրօնական հանդիպումի միջոցառումին դիտել կու տայ, որ այդ հանդիպումը ամէն տարի կը յիշեցնէ երկխօսութեան քաջութիւնը ապա կը նշէ, թէ կրօնական առաջնորդները կանչուած են ըլլալու ճշմարիտ երկխօսներ, կանչուած են գործելու խաղաղութեան կառուցումին մէջ՝ ոչ թէ որպէս միջնորդներ, այլ որպէս իսկական միջամտողներ։ Իւրաքանչիւրը մեզմէ կանչուած է խաղաղութեան արուեստագէտ ըլլալու՝ միացնելով եւ ոչ թէ բաժնելով, վերացնելով ատելութիւնը եւ ոչ թէ զայն պահպանելով, բանալով երկխօսութեան ուղիները եւ ոչ թէ բարձրացնելով նոր պատնէշներ» գրած է Քահանայապետը «Խաղաղութեան համար խօսքեր» հատորի նախաբանին մէջ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
