Ֆրանչիսկոս Պապ խնդրեց աղօթել Մայոթ կղզիախումբին մէջ զօրաւոր մրրիկի հետեւանքով զոհուածներուն համար

Վազգէն Աբարդեան - Վատիկան

Երկուշաբթի, 16 դեկտեմբերին, քահանայապետական Իքս ընկերային ցանցին վրայ հրապարակուեցաւ Ֆրանչիսկոս Պապին հրաւէրը աղօթելու վերջին ժամերուն, Մայոթ կղզիներու խումբ հարուածած զօրաւոր մրրիկի թիրախ զոհերու համար։
Ֆրանչիսկոս Պապ այդ աղօթքի հրաւէր ուղղեց կիրակի 15 դեկտեմբերին Քորսիքա կղզիի կեդրոնական քաղաք՝ Այաչչոյի  կատարած միօրեայ այցելութեան ծիրէն ներս Մարեմեան աղօթքը աւարտելէ ետք։

Նշենք, թէ 200 քմ արագութեամբ հովի ուժով Մայոթ Կղզախումբը հարուածող, Քիտօ կոչուած մրրիկի պատճառով զոհուածներու թիւը կարելի է որ հարիւրաւոր կամ հազարաւոր ըլլան, յայտարարած է Հնդկական Ովկիանոսի ֆրանսական տարածքի տեղական իշխանութիւնը։