100 մսուրներ Վատիկանի մէջ
Ռոպէր Աթթարեան - Վատիկան
Հինգերորդ անգամն ըլլալով Վատիկանի Սուրբ Պետրոս հրապարակի կամարներուն տակ պիտի ներկայացուին աշխարհի տարբեր երկիներէ արուեստագէտներու իրագործած Յիսուսին Սուրբ Ծնունդը նկարագրող մսուրները «100 մսուրներ Վատիկանի մէջ» խորագիրին տակ։
Այս տարի պիտի ցուցադրուին աւելի քան 120 մսուրներ, որոնք Վատիկան կը հասնին Եւրոպական տարբեր երկիրներէ ու նաեւ աշխարհի այլ վայրերէ շնորհիւ այդ Երկիրներու Վատիկանի մօտ հաւատարմագրուած դեսպաններուն, որոնք թիկունք կանգնեցան ձեռնակին։
100 աւելի ստեղծագործութիւնները կ՛ ամփոփեն նկարիչներու եւ արուեստագէտներու ոգեշնչումն ու երևակայութիւնը, որոնք զանոնք պատրաստեցին շատ տարբեր նիւթերով, օրինակ՝ թերթ, գործուածք, խցան, փայտ, թրծուած կաւ։
Ցուցահանդէսը բաց պիտի մնայ հինգ շաբաթներ ամբողջ սկսեալ 8 դեկտեմբեր 2022 էն մինչեւ 8 Յունուար 2023, առաւօտեան ժամը 10էն մինչեւ երեկոյեան 7,30։ Մուտքը ազատ է եւ անոր կազմակերպութեան հարցով կը զբաղին Աւետարանութեան Վերատեսչութեան կամաւորները։
Ցուցահանդէսին բացումը տեղի կ՛ունենայ հինգշաբթի 8 դեկտեմբերի յետմիջօրէի ժամը 4ին գլխաւորութեամբ Գերապայծառ Ռինօ Ֆիզիքելլայի։ Ներկայ պիտի գտնուին Սուրբ Աթոռի մօտ հաւատարմագրուած դեսպանատուներու ներկայացուցիչներ մինչ բացման արարողութեան ելոյթ կ՛ունենան նաեւ Վատիկանի ոստիկանութեան երաժշտական խումբը։
Ձեռնարկը կարելի դարձաւ շնորհիւ UnipolSai ապահովագրական ընկերութեան եւ այլ կազմակերպութիւններու առատաձեռնութեան։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
