Մահացած է գերմանացի կարդինալ Ռաուպերը, որ համայն կեանքը նուիրեց Սուրբ Աթոռի դիւանագիտութեան

Ռոպէր Աթթարեան - Վատիկան

Երէկ` 26 Մարտի երեկոյեան իր մահկանացուն կնքեց 89 ամեայ գերմանացի կարդինալ Քարլ Ժոզէֆ Ռաուպերը։

1934 ի ծնունդ Կարդինալ Ռաուպեր` Քահանայ ձեռնադրուած է 1959ին եւ իր առաջին պաշտօնը վարած է Նիտտա քաղաքի փոքրիկ հասարակութեան մօտ։ 1962ին Հռոմ կը փոխադրուի Եկեղեցական Կանոնագիտութեան մասնաճիւղը աւարտելու համար, ուր կը յաճախէ նաեւ Եկեղեցական Քահանայապետական Ակադեմիան։

1966ին կը սկսի իր դիւանագիտական պաշտօնավարութիւնը, դառնալով Պենելլի Կարդինալին քարտուղարներէն մին, երբ այս վերջինս կը վարէր Պետական Քարտուղարութեան տեղակալի պաշտօնը։

1977էն ետքը ան նախ դարձաւ Նուիրակութեան Խորհրդական` Պելկիոյ, Լուսսեմպուրկի եւ Յունաստանի առաքելական նուիրակութիւններուն մէջ։ 18 դեկտեմբեր 1982ին Սուրբ Յովհաննէս Պօղոս Բ զինք կ՛անուանէ Ուկանտայի մօտ Առաքելական Նուիրակ եւ 1983ի Յունուարի վեցին անոր կը շնորհէ եպիսկոպոսական օծումը Սուրբ Պետրոս Պազիլիքային մէջ։

1990 թուականին երջանկայիշատակ Քահանայապետը անոր կը վստահի Եկեղեցական Քահանայապետական Ակադեմիայի նախագահութիւնը եւ երեք տարիներ ետք զայն կ՛անուանէ Քահանայապետական ներկայացուցիչ նախ Զուիցերիոյ եւ Լուսսեմպուրկի մօտ, ապա Հունգարիա եւ Մոլատվիա հուսկ Պելկիա եւ Լուսսեմպուրկ։

75 տարեկանը թեւակոխած` 2009 թուականին, ան կը լքէ դիւանագիտութեան ասպարէզը ու կը քաշուի Գերմանիա ուր Ռոթընպուտկ-Սթութկարդ թեմին մէջ կը շարունակէ իր հոգեւոր առաջնորդի գործունէութիւնը։ Ֆրանչիսկոս Պապը զինք Կարդինալ նշանակեց` 14 փետրուար 2015ին։

Կարդինալ Ռաուպերի մահով Կարդինալական դասի կազմը հետեւեալ ձեւով կը ձեւաւորուի` ընդհանուր 222 կարդինալներ որոնցմէ 123ը Քահանայապետ ընտրելու իրաւունքով Ծիրանաւորներ իսկ 99-ն ոչ ընտրող։