Սուրբ Պետրոսի տաճարին մէջ ուխտաւորները հրաւիրուած են աղօթքի հաղորդութեան ԵՀՕ երիտասարդներու համար

Վազգէն Աբարդեան - Վատիկան

1էն – 6 օգոստոս, Լիզպոնի երիտասարդներու համաշխարհային օրուան առիթով, Վատիկանի Սուրբ Պետրոսի տաճար այցելող բոլոր ուխտաւորները հրաւիրուած են աղօթքի հաղորդութեամբ միանալու Լիզպոնի մէջ երիտասարդներու հետ որոնց ընկերացած է Ֆրանչիսկոս Պապը։

Համագործակցութեամբ աշխարականներուն, ընտանիքի եւ կեանքի վերատեսչութեան, Սուրբ Պետրոսի դամբարանը այցելող ուխտաւորները հրաւիրուած են աղօթելու, Վատիկանի տաճարի մէջ մատուցուած սուրբ պատարագի արարողութիւններուն ընթացքին, ինչպէս նաեւ Սուրբ Խորհուրդի մատրան մէջ Սուրբ Հաղորդութեան պաշտամունքին ժամանակ, որ կը սկսի առաւօտեան 8,30ին, մատուցուած սուրբ պատարագէն ետք եւ կ՝աւարտի յետմիջօրէին ժամը 4,30ին։

Սուրբ Պետրոսի տաճարի մէջ Սուրբ Խորհուրդի մատրան մուտքին ծանուցումով մը կը յիշուի Երիտասարդներու համաշխարհային օրուան յատուկ օրակարգը, ինչպէս նաեւ այն բոլոր տեղեկութիւնները՝ մուտք գործելու համար Սուրբ Պետրոսի տաճարի կայքէջին երիտասարդներուն համաշխարհային օրուան նուիրած էջին մէջ եւ ներբեռելու երիտասարդներու համաշխարհային օրուան պաշտօնական աղօթքները տարբեր լեզուներով։