G7. հաշմանդամներու հարցերով նախարարները այցելեցին Վատիկանի Ռատիոյի թանգարան
Վատիկան Նիուզ – Հայկական Բաժանմունք
Մեծ եօթնեակի հաշմանդամներու հարցերով նախարարներու պատուիրակութիւնը այսօր 17 հոկտեմբերի առաւօտեան Ֆրանչիսկոս Պապին հետ ունկնդրութիւնէն յետոյ այցելեցին Վատիկանի Մարքոնի շէնքին Ռատիոյի թանգարանը: Այս հանդիպումը ընդգծեց հաղորդակցութեան միջոցներու կարևորութիւնը ներառական հասարակութեան համար:
Հաղորդակցութեան Վերատեսչութեան Վերատեսուչ Տիար Փաոլօ Ռուֆֆինի, ողջունելով նախարարները` յոյս յայտնեց ապագայի մը համար, ուր բոլոր մարդիկը, անկախ իրենց կարողութիւններէն, կարող ըլլան մաս կազմել իրենց համայնքին։ Ան ակնարկեց «Ոչ ոք բացառուած է» նախագիծին և «Վատիկանը բոլորի համար» յաւելուածը, որոնք ուղղուած են խթանելու մատչելի հաղորդակցութիւն մը։
Միջոցառումին ներկայ էին նաև Գերապ. Էրիօ Քասթելուչչին, Իտալիայի Եպիսկոպոսական Համահաւաք դասի (CEI) փոխնախագահը և քուեր Վերոնիքա Տոնաթելլոն, որ պատասխանատու է հաշմանդամութիւն ունեցող մարդկանց հովուական խնամակալութեան: Երկուքն ալ շնորհակալութիւն յայտնեցին նախարարներուն հաշմանդամութիւնն ու ընդգրկումը «G7» օրակարգ մտցնելու կարևոր քայլին համար։
Այս հանդիպումը ոչ միայն ամրապնդեց հաստատութիւններու միջև կապերը, այլեւ ընդգծեց ընդհանուր յանձնառութեան մը անհրաժեշտութիւնը՝ երաշխաւորելու համար բոլորին մասնակցութիւնը հասարակութենէն ներս:
Նախաձեռնութիւնը նշանակալից առաջընթաց մը կը ներկայացնէ միջազգային մակարդակով հաշմանդամութեան խնդիրներու վերաբերեալ իրազեկութիւնը բարձրացնելու գործին մէջ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
