Ֆրանչիսկոս Պապ պիտի ճաշէ աւելի քան հազար աղքատ անձերու հետ

Վազգէն Աբարդեան - Վատիկան

Յառաջիկայ 17 նոյեմբերին, Ֆրանչիսկոս Պապ պիտի նշէ աղքատներու նուիրուած ութերորդ միջազգային օրը ճաշելով աւելի քան հազար կարիքաւոր անձերու հետ ու պիտի օրհնէ 13 բանալիներ, որոնք կը ներկայացնեն այն 13 երկիրները, ներառեալ Սուրիան, ուր պիտի կառուցուին կարիքաւորներուն համար բնակարանները «Amvin Homeless Alliance9 «13 տուներ» ծրագիրին համաձայն։

Ֆրանչիսկոս Պապ այս տարուան աղքատներու նուիրուած օրուան նիւթ ընտրեց Սիրաքայի գիրքէն քաղուած հատուածը, «Աղքատին աղօթքը կը բարձրանայ մինչեւ Աստուած», ընդգծելով աղքատներու կարեւորութիւնը ու Աստուծոյ սիրտին մէջ աղքատներուն առանձնաշնորհեալ տեղը։

Աղքատներու նուիրուած միջազգային օրուան նախորդող շաբաթը «Ողորմածութեան Մայր» բուժարանը կը տրամադրէ անվճար բժշկական օգնութիւն ընդլայնելով իր աշխատանքային ժամերը՝ կարիքաւորներուն աջակցութիւնը ապահովուելու համար։ Նախատեսուած են նաեւ տարբեր բարեգործական նախաձեռնութիւններ, ինչպէս դժուարութիւններու մէջ գտնուող ընտանիքներու համար ստացագիրներու վճարումը, համագործակցութեամբ ժողովրդապետութիւններուն եւ շնորհիւ UnipolSai կազմակերպութեան առատաձեռնութեան։

Գերապայծառ Ռինօ Ֆիզիքելլան իր ելոյթին մէջ կարեւորեց աղքատներու նուիրուած միջազգային օրը, որպէս առիթ աղքատներուն օգնելու համար, հրաւիրելով հասարակութիւնը աղօթելու աղքատներուն համար։

Աղքատներու միջազգային օրուան նուիրուած սուրբ պատարագին մասնակցելու համար տոմսերը հասանելի են 13 նոյեմբերէն։