«Սերպիան եւ Քոսովոն համաձայնած են կեանքի կոչելու յարաբերութիւնները կարգաւորելու Եւրոպական Միութեան առաջարկած ծրագիրը» կ՝ըսէ Պորել
Սերպիան եւ Քոսովոն համաձայնած են կեանքի կոչել յարաբերութիւնները կարգաւորելու Եւրոպական Միութեան առաջարկած ծրագիրը: «Էսոշիէյթըտ Փրես» լրատու գործակալութիւնը կը հաղորդէ, որ այս մասին յայտարարած է Եւրոպական Միութեան արտաքին ու անվտանգութեան քաղաքականութեան բարձրագոյն յանձնակատար Ճոսեփ Պորել:
Համաձայնութիւնը ձեռք բերուած է Սերպիոյ նախագահ Ալեքսանտր Վուչիչի, չճանչցուած Քոսովոյի վարչապետ Ալպին Քուրթիի եւ Եւրոպական Միութեան պաշտօնատարներու միջեւ 12 ժամ տեւած բանակցութիւններուն հիմամբ:
Կը նշուի, որ նախքան եռակողմ հանդիպումը, Սերպիոյ նախագահն ու Քոսովոյի ներկայացուցիչը առանձին հանդիպումներ ունեցած են Պորելի հետ:
Եւրոպական Միութեան ծրագիրը երկու երկիրներուն կոչ կ՛ուղղէ պահպանելու բարի դրացիական յարաբերութիւններ եւ ճանչնալու իրարու պաշտօնական փաստաթուղթերն ու ազգային խորհրդանիշերը: Միեւնոյն ժամանակ, համաձայնագիրը, որ Ֆրանսայի եւ Գերմանիոյ կողմէ մշակուած է Միացեալ Նահանգներու աջակցութեամբ, բացայայտօրէն չի պահանջեր Քոսովոյի եւ Սերպիոյ միջեւ փոխադարձ ճանաչում:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
