Արցախի վրայ Ատրպէյճանի յարձակումին պատճառով կան 200 զոհեր եւ 400 վիրաւորներ

Արցախի Մարդու իրաւունքներու պաշտպան Գեղամ Ստեփանեան մինչ այդ հաղորդեց, որ Ասկերանի, Մարտակերտի, Մարտունիի եւ Շուշիի շրջաններու 16 համայնքներէն տարհանուած են առաւել քան 7000 անձեր: 

Ռուսիոյ պաշտպանութեան նախարարութիւնը տեղեկացուց, որ վերջին 24 ժամերուն ընթացքին, ռուս խաղաղապահները Լեռնային Ղարաբաղի առաւել վտանգաւոր շրջաններէն շուրջ 2000 խաղաղ բնակիչներ տարհանեցին. անոնց կէսէն աւելին՝ 1049ը, մանուկներ են: Անոնց մէկ մասը ապաստան գտաւ խաղաղապահներու տեղակայման վայրին մէջ, մնացեալին մասին յստակ տեղեկութիւններ չկան: 

Նախարարութիւնը դիտել տուաւ, որ զոհեր արձանագրուեցան նաեւ ռուս խաղաղապահներուն մէջ: 

Ըստ մարդու իրաւունքներու պաշտպանի գրասենեակին կողմէ հաւաքագրուած տուեալներուն՝ 20 Սեպտեմբերի երեկոյեան ժամը 9:30ի դրութեամբ՝ Արցախի մէջ կան առնուազն 200 զոհեր եւ առաւել քան 400 վիրաւորներ: Վիրաւորներուն մէջ կան աւելի քան 40 քաղաքայիններ, որոնցմէ 13ը՝ մանուկներ: Զոհերուն մէջ կան 10 խաղաղ բնակիչներ, որոնցմէ 5ը մանուկներ են:

«Մեր գրասենեակի կողմից անյայտ կորածների ճակատագիրը պարզելուն ուղղուած փաստահաւաք աշխատանքները շարունակւում են», կը տեղեկացնէ մարդու իրաւունքներու պաշտպանի գրասենեակը:

Աղբիւրը՝ Ասպարէզ