Կեպրէեսուս. «Էքս» ժահրի համաճարակի տարածումը պարզապէս ժամանակի հարց դարձաւ»

Առողջապահութեան միջազգային գործակալութեան տնօրէն Թետրոս Ատհանոմ Կեպրէեսուս զգուշացուց նոր համաճարակէ մը` ընդգծելով. «Անոր տարածումը պարզապէս ժամանակի հարց դարձաւ»:

Կեպրէեսուս Տուպայի մէջ կառավարութիւններու համաշխարհային խորհրդաժողովի մասնակիցներուն յայտնեց. «Էքս» հիւանդութեան վերաբերեալ հարցը այն չէ, թէ աշխարհին պիտի հարուածէ՞, թէ՞ ոչ, այլ ատիկա ե՞րբ տեղի պիտի ունենայ»:

Ան ըսաւ, որ 2018-ին նոյնպիսի զգուշացում մը հրապարակած էր, թէ համաճարակ տեղի պիտի ունենայ, եւ «Քորոնա» ժահրի մահաբեր համաճարակին տարածումով փաստուեցաւ, որ իրաւունքով էր:

Կիպրէեսուս շեշտեց. «Աշխարհը տակաւին անպատրաստ է նոր համաճարակ դիմակայելու», եւ կրկնեց իր պահանջը «մինչեւ մայիս ստորագրելու յառաջիկայ համաճարակին պատրաստուելու եւ զօրակոչի ենթարկուելու միջազգային համաձայնագիրը մը»` այդ համաձայնագիրը նկատելով «մարդկութեան համար վճռական կարեւորութիւն ունեցող:

«Էքս» հիւանդութիւնը տակաւին չէ տարածուած, սակայն Առողջապահութեան միջազգային գործակալութիւնը զայն այդ անունով կը կոչէ` ակնարկելու համար ներկայիս ծանօթ չեղող վարակիչ պարագաներու, որոնք կրնան շարք մը երկիրներու մէջ տարածուելու պարագային համաճարակի վերածուիլ:

Գոյութիւն ունի այն նախատեսութիւնը, որ անիկա «Քորոնա» ժահրէն 20 անգամ աւելի մահացու կրնայ ըլլալ:

Աղբիւրը՝ Ազդակ