Ուաշինկթըն արգելակած է Կազայի մէջ մարդասիրական օժանդակութիւններու սպասող քաղաքայիններու սպանդին համար Իսրայէլը մեղադրող ապահովական խորհուրդի յայտարարութիւնը

Միացեալ Նահանգներու նախագահ Ճօ Պայտըն Քաթարի եւ Եգիպտոսի հետ քննարկեց գերիներու ազատ արձակման դիմաց Կազայի մէջ առնուազն 6 շաբաթ տեւողութեամբ զինադուլի հաստատման հարցը: Այս մասին յայտարարեց Սպիտակ տունը:

Սպիտակ տան հրապարակած հաղորդագրութեան համաձայն, Պայտըն Քաթարի շէյխ Թամիմ պըն Համատ Ալ Թանի իշխանին եւ Եգիպտոսի նախագահ Ապտել Ֆաթթահ Սիսիի հետ երկու անջատ հեռաձայնային հաղորդակցութիւններու ընթացքին քննարկած է հիւսիսային Կազայի մէջ օժանդակութիւններու յանձնման ընթացքին պատահած «ողբերգական, եւ մտահոգիչ» դէպքը:

Յիշեցնենք, որ իսրայէլեան բանակը չորեքշաբթի, 28 փետրուարին ռմբակոծած էր մարդասիրական օժանդակութիւններ ստանալու համար հերթի կանգնած քաղաքայիններու բազմութիւն մը` պատճառելով առնուազն 112 զոհեր եւ 760 վիրաւորներ:

Ֆրանսայի նախագահ Էմանուել Մաքրոն բուռն կերպով դատապարտեց ու զայրոյթ արտայայտեց Կազայի հիւսիսը մարդասիրական օժանդակութիւններու յանձնման ընթացքին «տասնեակներով պաղեստինցիներու սպանութեան» առնչութեամբ` պահանջելով բացայայտել «տեղի ունեցածին ճշմարտութիւնն ու զոհերուն համար արդարութիւն ապահովել»:

Ֆրանսայի արտաքին գործոց նախարարութիւնը իր կարգին յայտնեց, որ անոնց սպանութիւնը «անարդարանալի է»` նշելով, որ պէտք է ճշմարտութիւնը բացայայտել: «Իսրայէլի պատասխանատուութիւնն է յանձնառու ըլլալ միջազգային օրէնքին եւ պաշտպանել քաղաքային բնակչութեան մարդասիրական օժանդակութիւններու յանձնումը»:

Ֆրանսայի արտաքին գործոց նախարար Սթեֆան Սեժուռնէ երէկ կոչ ուղղեց դէպքին շուրջ անկախ հետաքննութիւն կատարելու: «Այսօր կ՛ուզեմ շատ յստակ ըլլալ: Բացատրութիւններ կը պահանջենք, եւ անհրաժեշտ պիտի ըլլայ տեղի ունեցածը ճշդելու համար անկախ հետաքննութիւն կատարել», «Ֆրանս ինթեր»-ին ըսաւ ֆրանսական դիւանագիտութեան պետը:

Քանատայի արտաքին գործոց նախարար Մելանի Ժոլի վերոնշեալ դէպքը որակեց «մղձաւանջ»` կոչ ուղղելով բնակչութեան պաշտպանութիւնը երաշխաւորելու:

Եւրոպական Միութեան արտաքին քաղաքականութեան բարձրագոյն յանձնակատար Ճոզեփ Պորել յայտնեց. «Կազայի մէջ քաղաքայիններու նոր ջարդ տեղի ունենալու տեղեկութիւններէն սարսափ զգացի: Կազայի մէջ քաղաքայիններու սպանութիւնն ու մարդիկ սննդական օժանդակութիւններէն զրկելը միջազգային մարդասիրական օրէնքի վտանգաւոր ոտնահարում մը կը նկատուի»:

«Պէտք է առանց խոչընդոտներու մարդասիրական օժանդակութիւններու Կազա հասանելիութիւնը արտօնել», ըսաւ Պորել:

«Թայմզ աֆ Իզրայէլ» հաղորդեց, որ Արաբական երկիրները չեն յաջողած աջակցութիւն ապահովել ՄԱԿ-ի Ապահովութեան խորհուրդի յայտարարութեան համար, որ Իսրայէլի զինուորները կը մեղադրէ Կազայի մէջ սննդամթերք եւ մարդասիրական այլ օգնութիւն սպասող մարդոց վրայ կրակելու եւ անոնցմէ աւելի քան 100-ը սպաննելու յանցանքով:

ՄԱԿ-ի մէջ Պաղեստինի դեսպան Ռիատ Մանսուր Ապահովութեան խորհուրդի արտակարգ փակ նիստէն ետք լրագրողներուն յայտնած է, որ խորհուրդի 15 անդամներէն 14-ը զօրակցած են Ալճերիոյ կողմէ ներկայացուած յայտարարութեան: Միայն Միացեալ Նահանգները դէմ արտայայտուած են:

ՄԱԿ-ի մէջ Միացեալ Նահանգներու մնայուն ներկայացուցիչի տեղակալ Ռապըրթ Վուտ իր կարգին Ուաշինկթընի քայլը բացատրած է ըսելով. «Մենք չունինք բոլոր փաստերը, ահա թէ ի՛նչ է խնդիրը»:

Միացեալ Նահանգներու արտաքին գործոց նախարարութիւնը յայտարարեց, որ Միացեալ Նահանգներու արտաքին գործոց նախարար Էնթընի Պլինքըն Քաթարի վարչապետ, արտաքին գործոց նախարար Մոհամետ պըն Ապտելռահման Ալ Թանիի հետ քննարկած է Կազայի մէջ գերիներու ազատ արձակման եւ հաւանական մարդասիրական զինադուլի հաստատման ջանքերը:

Իսրայէլի վարչապետ Պենիամին Նեթանիահու յայտարարեց. «Ես կը պահանջեմ նախապէս իմանալ բոլոր առեւանգուածներու անունները, որոնք ազատ պիտի արձակուին ծրագիրի ծիրին մէջ: Այս հարցումին պատասխանը ես տակաւին չեմ ստացած: Տակաւին կանուխ է ըսել, թէ արդեօք մենք յառաջիկայ օրերուն զինադուլի շուրջ համաձայնութիւն պիտի գոյացնե՞նք»:

«Գործարքով կամ առանց գործարքի մենք պիտի շարունակենք պայքարիլ մինչեւ լիակատար յաղթանակ», ընդգծեց ան:

«Հատաս» պատկերասփիւռի կայանը հաղորդեց, որ Իսրայէլի պատուիրակութիւնը յառաջիկայ օրերուն պիտի մեկնի Գահիրէ, ուր պիտի բանակցի Կազայի մէջ զինադուլի հաստատման եւ անոր դիմաց պաղեստինցի գերիները իսրայէլացի գերիներու հետ փոխանակելու հարցին շուրջ:

Աղբիւրը՝ Ազդակ